خۆنیشاندانێت مە و دوو تەرازی ⚖️!
جاسم محمد شرنەخی
یێ ل گەل خۆ ڕاست بت، وژدان هەبت دێ بینت (3) ستەمكاری ژ (3) لایەنێت جودا دژی كوردستانا مە دهێنە كرن هەمی پێدڤی ب ئیدانەكرنا جەماوەرینە و ئەگەر خۆنیشاندانێن سەرانسەری دژێ تەعداكرن و زولمێ ژ ئەركێن نیشتمانی بت; بێ گومان ژبۆ هەر سێیان ژ ئەركێن حەتمینە، و دڤییا هەڤكاری ژبۆ ئەنجامدانا ڤی ئەركی هەبت، هەر چ نەبت قەت نابت ڕێگری لێ بهێتە كرن:
1- خونیشاندان ل دژی تەعداكرنا جارجارا ئیرانێ.
2- خونیشاندان ل دژی تەعداكرنا بەردەواما توركان، ئەوا ژ بلی گوشتنا كوردان گەلەك ژ گوند و ئاقارێت مە ژی كرینە دەڤەرێن قەدەغەكری ل مە.
3- خونیشاندان ل دژی زوڵم و زۆرییا تاقم و تۆڕ و باندێن گەندەڵكاریێ ل كوردستانێ ئەوێن ئەڤە (33) ساڵان خوینا خەلكێ دمێژن و ڤی ملەتی هەژار و تەنگاڤحال و زڕبەهر دكن.
- بەلێ مخابن هەمبەر یێن دژی توركان و یێن دژی گەندەڵی و خوارنا مافێن فەرمانبەران حكۆمەت – نەمازە ل زۆنا زەر – ب چیڤێ توندێ ئەمنی و پولیسی سەرەدەری و ڕەفتارێ ل دژی خونیشاندەران دكت، ب ڕێ ل گرتنێ، ب دەستەسركرنێ، جاران ب حوكم و زیندانكرنێ، بەلێ ژبۆ دژی تەعداكرنا ئیرانی وە دیت چ حنێر و بزاڤ حكومەتێ كرن، هەوجە ناكت بەحس ژێ بكین!
هوسان دوو تەرازی و وەكی دبێژن: بانەك و دوو هەوا چاڤێن خۆ زیق دیار دكن.
باشە ل دژی وەڵاتەكێ هەوە وەكو حوكمڕان شیان نینن هەلویستەكێ گونجای وەرگرن، ئەڤ چەندە نەیا ب زەحمەتە ئەم تێبگەهین، بەلێ هەر چ نەبت ڕێ ل سادەترین مافێ سرۆشتی و ڕەوا یێ جەماوەری نە كرن، هەما هەواركرنا ل دژی زولم و تەعدایێ بهێلن، هەر چەندە گەلەك پێڤە ژی ناهێت بەلێ بەس بفەتسینن، بلا بچەك ئاڤ ل ڕویێ وە بمینت!