كورد د بيانى پەرێسن

دەمهات نوری ئەبدال

مژارا پێشوازيكرنا تاتليس, رەھندێن كووير بخوەڤە دگريت: سايكولوژى، جڤاكى، ئولى، رۆلێ پەروەردێ تد. كانێ چما مللەتێ كورد خوەكێم و بيانى پەرێست دبينيت بتايبەت ل ھەمبەر دوژمنێ ب درێژاھيا ديرۆكێ خوينا مە رشتى. ب كورتى مرۆڤ دشێت بھەڤشێوەيێ ل خوارێ خواندنێن خوە ل سەر بيانى پەرێستيا ل جەم كوردان بدەتە دياركرن. دوژمنێ كورد ب سەدێ سالان ل سەر سايكولوژيا مرۆڤێ كورد كاركريە ھەيا بكارە وەكى نێچيرەكا بسەناھى كوردان ل گور بەرژەوەنديێن خوە بكاربينن، برێكێن جودا جودا بخاپينن. كورد مللەتێ ھەرى كەڤنارن ل سەر ڤێ ئاخێ، خوەديێن جاند و ھونەر و زمانن، د ديرۆكا خوەدا دەستكەفت ژ دەستداينە لێ وەكى جاند و ھونەر پێشەنگ و زنديماينە. دەربارەى ڕۆژەڤا ئيرۆ ئەوا ب كەلەژان پێشوازێ ل تاتليس كرى، خوەناسنەكرنا خوەيە وەكى كورد، چونكى خوەناسنەكريە كەفتيە د خزمەتا بيانى پەرێسيێدا. كورد گەھانە كۆپيتكا خوەپەرێستيێ: ب دەھێ سالانە بتايبەت ل درامايێن توركيا دنێرن لەورا كورد خوە ل ھەمبەر كەساتيا تورك كێمديتيە، خوە ل ھەمبەر نژادپەرێستيا فارسان بێماف و ترسنوك ديتيە لەورا ل بەر خلفا سێدارەدانێدا بوويە، خوە ب گوھێ مۆزيكا خوەيا كوردى كيڤى و كەڕ ديتيە، لێ مۆزيكا تورك، عەرەب و فارسان د گوھێ خوەدا خوەديكريە، د دەمەكيدا تورك، عەرەب و فارسان كۆكا مۆزيكا خوە ل سەر دزيكرنا مۆزيك و سترانا كوردى ئاڤاكرييە! خوە ل ھەمبەر كەلتورێن عەرەبان كولە و كێمديتيە لەورا داخبار بوويە كو دشداشە و عەباكێن رەش عەرەبى ل بەر بەژن و بالا خوە بكەن. كوردان ماموستايێن زيرەك و بليمەت دناڤ زانكويێن كوردستانێ دا ھەنە بتايبەت ماموستايێن ژيانا خوە ل دەرڤەى وەلاتى بوراندين، لێ وەكى ھەڤبەركرن خوە ل ھەمبەر ماموستايێن عەرب بێرەواج دبينن، مە زمانەك خوەش و شرين ھەيە لێ پرانيا كوردێن باكورێ كوردستانێ خوە ل كيرێ بن، ب زمانێ توركى دێ پەيڤن، وەھا كوردان دكێلەشوكا عەقلێ خوەيێ بەرتەنگدا بيانى پەرێستينە. ھەگەر نە، خوينا كوردان ژ ھونەرا تاتليس دباريت و تاتليس، بخوە پارسەك و مريدێ فاشيزما توركيا نە، ژ نوى ئەم پالپشتيا خوەيا ب كەلەژان ژ بۆ تاتليس دەردبرين. لێ ئەم ھونەرمەندێن خوەيێن كورد، كو ب درێژاھيا تەمەنێ خوە خزمەتا ئاخ و نەتەوەێ كوردستانى كرى گوھدار ناكەين، ژ ملەك دى ناسناكەين، ڕسوا دكەين. ڕوسۆ، ددەتە دياركرن كو سروشتێ مرۆڤان وەكى يێ ڕوەكانە، لەورا پێتڤى ب چاڤدێرى و پيتەپێدانەكا گرنگ ھەيە، لێ چاڤدێرى درێزا ئێكێدا ژ بۆ ڕۆلێ پەروەردێ دزڤريت، داھێنان و پيتەپێكرنا پەروەردێ بخوە ئەرك و بەرپرساتيا حكومەتێ يە، لێ ديارە كو حكومەت ژى ل سەر كەمژەكرنا خەلكى سودمەندە. دەمھات نوورى عەبدال