عشقا وەڵاتى ژ ڕەند و جوانیێ تا کۆرە دێهلیێ!
«دەمێ ئەمپریالست ژ مەزنێن مە ب وژدانتر و ب شەرەفتر بن»
جاسم محمد شرنەخى
هۆزانڤانێ عیراقى (ڕێزانێ هەلبەستا سەربەست) يێ ناڤدار (بەدر شاکر السیاب) ئەوى یا هەرى دویر ژ کەنارێ خەیالا خوەیا هوزانێ دەربارەى وژدانسزى و بێ دلۆڤانییا داگیرکەران هەمبەر سەروەت و سامانێت وەڵاتى هزر و ساویر دکر: ئەو دێ مینا هندەک دەهمەنپیسێن بیانى ل گەل ژنەکا جوان و لاشفرۆش هەتا هیچ باڵکێشى و تشتەک ژ جوانىێ تێدا نەمینت ڕەفتاران کن، لێ دەمێ ئەو نازکە ژن بگەهت قویناغا هەرە ڕەزیلییا ژیانێ و دناڤ دەست و لنگ و ڕەهنێن وان شلاتییاندا پویچ دبت و د سەر حالێ خوەڕا ژى بیناهییا جاڤان ژى بەرزە دکت، واتە بکورتى وەکى وى ب خوە ب (دێهلا کۆرە) ناڤ کرى، ئێدێ کەسەک تەماهییا خوە نابەتێ! لەوا هەمى ژێ تێربووین و تەڤدا خوە ژێ دانە پاش، دا گوهـ بدەینە (سەییاب)ـى د هەلبەستا خوەیا بناڤێ (المومس العمیاء- دێهلا کۆرە) ژبەر بهایێ وێ هەلبەستێ دیوانەک ژى هەمان ناڤ لێ کرى چ دبێژتن: كان الزبائن بالمئات، ولم يكونوا يقنعون بنظرة قمراء تغصبها من الروح الكسيرة لترش أفئدة الرجال بها، وكانوا يلهثون في وجهها المأجور، ابخرة الخمور ، ويصرخون كالرعد في ليل الشتاء . ئانکۆ: کڕۆکێن وێ ب سەدەهان بوون ب دیتنا هەیڤا گەشا ژ گیانێ ویێ شکەستى.. یێ تەعدالێبووى ڕازى نەدبوون ئەوێ ل دلێن زەلامێن ل پەى وێ دکرنە ڕابەزین ئەوێ بوخیرا مەیێ دڕەشاند.
وەکى گوڕگوڕا عەوران ل شەڤین زفستانێ ئەوان دکرنە فیغان لێ پشتى جوانییا دێم و لاشى ژ دەست دای و هەردوو چاڤێن وێ تاریبووین، هەمییان پشتا خوە دانەیێ، ئێدێ نانەک ژ ڤێ قەحبا کۆرەڕا دبیتە هەسرەت، هەتا ناڤێ وێ ژى کو (سەلیمە) بوو ووندا دبیت، ب تڕانە و یاری پێکرن (زناکەر) ب ناڤێ (صەباح) بانگ دکەنێ: هي- منذ أن عميت – ” صبـــاح ” فأي سخريــة مريره ! أين الصباح من الظلام تعيش فيه بلا نهار وبلا كواكب أو شموع أو كوى وبدون نار؟ ئانکۆ: ئەوە بیناهی نەماى یا بوویە (صەباح) ئاخ چ تەحلەتڕانەیەکە ئەڤە! ژناڤا تاڕیاتیێ، سپێدە (صەباح) ل کویڤەیە؟! وێ تەنها شەڤ هەیە، بێى ڕۆژ دژیت شەڤەکا بێ ئەختەر بێ فند و شەماڵ و چرا مایە! واتە: شەڤا وێ خۆلی عەیشا کۆرە شەڤە و ڕۆژا وێ ھەر تاری شەڤە، ئەها هۆسان هۆزنڤانێ مەزن د ساڵێن پێنجیاندا ژ چەرخێ بوورى ئەڤ دیمەنێ مەرگەسات ژ خرابکارییا دوژمنێن بیانى ب فرچێ هوزانا خوە نیگار دکر.
لێ وى و هەمى خەلکێ ل گەل وى دژیان قەد عەقل و خەیالێن وان ئەو ڕاستیێن «نەبەر ئاقل»یێن ئەڤرۆ ل عیراق و کوردستانێ بەرچەستە دبن ساویر و هزر نەدکرن، ب چ ڕەنگارن نەدکارین دجیهانا ئاشۆپیدا ژى ببینن: کو دێ کار و کریار و ڕەفتارێن دەهمەن پیسانە سەد قاتى خراپتر ژ وێ یەکا د هەلبەستا (المومس العمیاء)ـدا ل گەل وێ بیکا جوانا دبێژنێ وەڵات هێتە کرن، دەهمەن پیس ژى نە دێ داگیرکەر و ئەمپریالیست بن، هەلبەت دێ هزار جارى ژ وان کەمباختر بن، لێ دێ ژ سەروەر و سەرکێشێن وەڵاتى ب خوە بن، دێ (حامیها حرامیها – زێڕڤانێن دز) بن.
گومان نینە، یێ ب کوژەک چاڤێ خوە ژى ڕاستییا ببینت ل پێش وى زۆر یا خویایە ل عیراقێ ئەڤە (19) ساڵە، ل هەرێما کوردستانێ ژى ئەڤە (31) ساڵە تاڵانەکا هێچ وێنەیەکێ میناکێ وێ د مێژوویا مرۆڤایەتیێدا نەهەى ژبۆ سامانێن ل سەر ئەردى و ل ژێر ئەردى بێ هیچ ڕەحم و ڕەوشتەک ژلایێ ستەمکارێن خویانیڤە – نەکو بیانیڤە- یا بەردەوامە، ئمپریالیستان ژ ساڵێن بیستان و ھەتا دەرازینکا نشتیمانیکرنا پەترۆلا عیراقێ ل ساڵا ١٩٧٢ تەنھا نەفتا عیراقێ ڤەدخوارن، قەت نەوەکی سەرکێشێن ئاخر زەمان «جوانەگا» ب سەر و پێ و ب کەڤلڤە د داعویرن، پەترۆل و ھەمی خێر و بێرێن وەڵاتی ددزن.
جۆرێ عشقا درەوا ڤان پیسە گەندەڵکاران ژبۆ وار و خاکی باش دیاربوو، تام مينا حەزا حەراما دەهمەن پیسەکێ چەپەڵە، یێ سەردەریێ ل گەل قەحبەیەکێ هندى جوان و ڕەند دکت، ڤێجا بزانە دەمێ پیر و گورە دبت دێ چەوان پێهنەکێ لێ دەت. ئەرێ والله خرابتر ژى، گەلۆ کێ د دونیایێ هەمیێدا ژ سەردەمێ جەنگیز خانى و هەتا بگەهیە هێتلەر و سەددامى و پاشێن مەزنێن ڤى زەمانى دیتیە: چەند باندەکێن دەستهەڵاتدار بیرێن پەترۆلێ ل خوە لێکڤە بکن، پاشان هەر کرۆپەک ڕاببت بەهرێن خوە دناڤبەرا خێزان و کور و برازا و پسمام و نەڤیێن خوەدا دابەش بکت؟!
ئەرێ کێ بهێستیە هەمى کونتراکت و خڕ بازرگانى و بازارێن ل گەل ژدەرڤە و یێن ناڤخویێن مەزن ژى هەمى ژلایێ بژارەیەکا حوکمڕأنان ڕا بهێنە قورغکرن و کونتڕۆلکن، یان ژى خوە بکنە خودانێن دۆخینێ بتنێ، ئەگەر ل ڤێ گۆڤ و کوتانا وان نەبت، ئەوا ئەم ژ سادەیى و ئەحمەقییا خوە دبێژنى: وەڵات؟! بەلێ ل کویڤە و کیژان زەمان چێبوویە هەر ساڵ بودجەیا زەبەلاح و ملیارێن دولاران بهێنە داعویران و هلمکرن، تەنها بۆ نموونە د ئەڤ ساڵەدا (2.5) ملیار دۆلار ژ دەستەییا گشتییا باجێ هاتنە دابەلعاندن،
ژ بۆ پشتڕاستیێ ل ڤى لینکێ ل خوارێ مێزە بکە( ) لەوا نابت کەسەک گازندەیا ژ (سەییابێ) عیراقى بکت دەمى ب ڤى تەڕزێ دلتیر و دلچەپەڵبووى وەڵات ددەستێن ئمپرایلیست و داگیرکەراندا وەسف کرى، ئەگەر سەرێ وى تا نها مابایە دا (…) وى تشتێن سەیر و عەجێبتر بینت. بدیتنا من: بەراوردە ل گەل مە خەلکێ ڤی سەردەمى (بەدر شاکر السیاب) ب دلەکێ ئاڕام یێ چوویە د گۆڕیدا، کاریکاتۆرەکێ سیاسى ئەز باڵکێش کرم، دەمێ خوەدیێ وى نەخشەیێ وەڵاتى کریە لەیمۆنەکا گڤاشتی و زوها مەزنەکێ خرابکارەکێ هەمى مێژتبوو د دەڤێ خوەیێ مەزندا!