ئازادیا ڕادەربرینێ مافە

مهەمەد چەلکی

ئازادی و ئازادیا ڕادەربرینێ مافێ هەر کەسییە و هەردەما ئازادی نەما جڤاک بەر ب هەلوەشان پاشڤەچوونێ دچت.
ئێک ژ سەدەمێن پاشڤەمانا رۆژهەڵاتێ ژ کاروانێ شارستانییەتێ نەبوونا ئازادی و رەخنێیە. ئەگەرێن پاشڤەمانا ڤان تێگەهێن سەقەت و پێشڤەچوون کوژ پیرۆزینە. پیرۆز بەری هەر تشتی ژ دروستکرن و ئافراندنا مرۆڤی ب خوەنە. سنوورێ پیرۆزیا بەردەوام دهێتە گوهۆڕین و ڤێ یەکێ ژی پەیوەندی یا هەی ب پێشڤەچوونا جڤاکی و زانستی. ب تایبەت زانستی کوشندەترین درب ل تێگەهێ پیرۆزیان دایە و بەردەوام لێ ددەت تا گەهشتیە وی ڕادەی ئێدی پیرۆزیان شیانێن خوە پاراستنێ و هێرشی کرنا سەر زانستی نەمایە و د قۆلاچێن پەرەستگەهان و جڤاکێن داخستی دا لەپەقۆتەکا کز دکەن.
هەر تشت د گوهۆرینێ دایە و زانست ژی، دینەمۆیا هەر گوهۆرین و پێشڤەچوونەکێ رەخنەو ئازادیا ڕادەربرینێیە.
من بەردەوام ل سەر گرنگیا ئازادیا ڕادەربرینێ نڤیسیە و پشتەڤانێ ئازادیا بێ سنوورم، ل وێ باوەرێ مە سنووردارکرنا بیاڤێ ئازادیێ، تێگەه و ئەرکێ ئازادیێ خرش دکەت، ل بن چ مەرج و هێجەتان نابت ئازادیا ڕادەربرین و رەخنێ بهێتە سنووردارکرن. ئازادی و ڕادەبرین ملحەما چارەسەریا هەر ئاریشە، برینەکا سیاسی، جڤاکی و زانستییە.
د گۆشەنیگایا تێگەهێ ئازادیێ ڕا ل ڤێ بابەلیسکا ڕادەبرینا هونەرمەندێ کورد عەمەر گوندی ل پەی خوە دروست کر و ئینایە رۆژەڤێ، مێزە دکەم، ب مافێ خوەرستی هەر دوو لا دبینم لێ نە ب ئاستێ هەڤ بریندارکرن و ڕاکێشانا دادگەهێ، کو ئەڤە گەلەکا زێدەبوو و نەدبوو داوکارێ گشتی خوە ئانیبا ڤی ئاستی چونکو ڕادەربرین هەروەکو د دستوورێ عێراقێ دا هاتی مافێ هەر وەڵاتیەکیە و نە گونەهە(جرم)، د ماددێ ٤٢ دا هاتیە:” هەر کەس د هزر و وژدان و باوەرا خوە دا یێ ئازادە.”
ئازادی هەر دەما هاتە سنووردارکرن چ ژ لایێ دەستهەلاتا سیاسیڤە بت یان ژ لایێ تیتال و دینیڤە بت کوشتنا ئازادیێیە. ئازادیێ ب خوە سنوور بۆ خوە دانانە ئەو ژی ئازادیا من هەتا سنوورێ تێکنەدانا ئازادیا تەنە ژ وێرێ وێڤە نابتە ئازادی. ل ڤێرە هەڤیرێ ئولی گەلەکێ ئاڤ هلکێشە و پیرۆزیێن خوە ل سەر یێ دن فەرز دکەت کو ئەڤە ب خوە تاوانە چونکو پیرۆزیێن تە یێن تەنە چ پەیوەندی بمنڤە نینە. هەر ئەڤە ژی بوویە سەدەم کو ئەڤرۆ هێڕشەکا نەڕەوا دهێتە سەر هونەرمەندێ کورد عەمەر گوندی.
هێرشا سەر عەمەر گوندی هێرشە ل سەر ئازادی وی بیاڤێ کێمێ هەی ل کوردستانێ، بێدەنگی ل سەر ڤێ هێڕشا نەڕەوا دێ رێکێ خوەش کت بۆ ڕەوتێ دژە ئازادی و کونزەرڤاتیف کو ئەڤرۆ خوە د ڕەوتێ ئیسلاما سیاسی دا دبینت. وەک دیرۆک دیار دکەت هەر دەما دەستهەڵات د دەستێ ئیسلاما سیاسی دا ژ بلی بێرێزیکرنا بهایێن مرۆڤی و کوشتن و زۆرداری و نە دادپەروەری و هەڤنەپەژراندن و سەتماندنا خرخالا پێشڤەچوونێ تشتەک دن ل جڤاکا زێدەنەکرنە و هەوجەی چ نموونا نینە چونکو نڤشێ نوکە داعش، رژێما سعودی، ئیران، سۆمال، بۆکۆ حەرام، پاکستان و ئەفغانستانێ دبینن و کانێ ژیان چەوان لێ برێڤە دچت.
ئازادی و ئازادیا ڕادەربرینێ دووبارە دبێژم ملحەما چارەسەریا هەر ئێش و گرفتەکا جڤاکی و زانستییە بێی ئازادی هەر تشت بەرەف مرنەکا هێدێ دچت.
٢-١٠-٢٠٢٢