ئەم کوردین و دێ ھەرمینیت کوردستان
محەمەد چەلکی
سلاڤ … هەرچەندە ئەڤ گۆتارا من بەری نوکە بەڵاڤ بوویە، لێ وەک بەرسڤ بۆ وێ هەڵایا مەلا عەبدولواحید و هەڤ ئاوازێن وی پەیداکری و بێڕێزی ل زمان و ئاخا کوردستانێ کری دووبارە ڤێ گۆتارێ بەلاڤ دکەم.
ئەم هەر ماین و دێ مینین کورد!**
گۆتن نەژادێ هەوە: ئەجنە و ژ رڤێشتا شەیتانینە … ئەم هەر ماینە کورد.
گۆتن هوین ژ نەژادێ بیژیێن ئەجنێن سلێمانینە …. ئەم هەر ماینە کورد.
گۆتن هوین ژ پاشمایێن وان تورکانە یێن ژ مەیدانا شەری ڕەڤین و خوە ل بن شکەفتان و چیایێن ئاسێ دا ڤەشارتین … ئەم هەر ماینە کورد.
گۆتن هوین ژ نەژادێ الاسدیێن عەرەبن …. ئەم هەر ماینە کورد.
گۆتن هوین بەرمایێن قەرەچ(دگەل رێزێن من بۆ قەرەچان) و ژبەر کۆلبێ تەقیایێن هندی و چیایێن قەفقاسینە …. ئەم هەر ماینە کورد.
گۆتن هوین هێشتا قەچاخچی و موغلاجی و رێگر و دز و کەلەشن و نەبووینە مرۆڤێن کەهی ….. ئەم هەر ماینە کورد.
گۆتن هوین تڤەنگا بکرێنە و هەر رۆژەکێ ل بەردەرێ بیانییەکی خولام و مێرکوژێن وینە …. ئەم هەر ماینە کورد.
گۆتن هوین کۆچەرن ژ چیایێن ئۆرال و ژ سەرما ئسکەندناڤیان تەقیانە و ل مە بووینە بەڵا …. ئەم هەر ماینە کورد.
گۆتن هوین ئەهریمەن پەرێس و ئاگر پەرێسن …. ئەم هەر ماینە کورد.
گۆتن هەوە مەنجەنیق داهێنایە و بابێ پێغەمبەرا ئەبراهام(ئیبراهیم) هەوە کرییە د ناڤ ئێتوینا دوژەهێ دا …. ئەم هەر ماینە کورد.
گۆتن پێغەمبەرێ ئیسلامێ ژ کاروکۆکێن هەوە ترسیایە و نەفرەت ل هەوە کرنە …. ئەم هەر ماینە کورد.
گۆتن هوین د تاریاتییا هۆڤبوونێ دا هار و ژ رێ دەرکەفتینە … هەوە تەڤ تەلەرویتێن ژ خارنا مارگویسک و کومکمە و کوللیان و ژ تێهنێ لێڤ قەشاڤی بووین ب ناڤێ غەزایێ هەوە بەردانە مە و کوردستان هەوە کرە گۆڕستانەکا ڤەکری و بهندێ رازی نەبوون هەوە کەچ و نارینێن مە سەبیکرن و ل بازارێن مەککەهێ و یەسربێ(مەدینێ) کڕین و فرووتن پێکرن …. ئەم هەر ماینە کورد.
گۆتن هوین ژ سەرڤە بووینە بوسلمان و ددلدا هوین هەر ماینە رۆژپەرێس لەوا بەردەوام هەوە فەرمان ل پەی فەرمانێ ل مە ڕاکرینە … هەمی گەلی، نهال، دول، دەشت، بانی و سەرێ چیایێن بلند مشتن ژ گۆڕێن بابپیرێن مە … ئەم هەر ماینە کورد.
گۆتن سەردەمێ ئوسمانیان چوو و هەمی مللەت دڤێت ئازاد بن و گەلەک دەولەتێن نوی هاتنە دامەزراندن، دبێژن: ئنگلیزا و فرەنسیا گۆتن: هوین نەڤیێن سەڵاحەدینێ ئەیوبینە و هەوە باپیرێن مە ب سەر و دلێ شکەستیڤە ژ ئورشەلیمێ(قودسێ) ڕاتەقاندنە، جەزایێ وە دڤێت هوین بێ دەولەت بن …. ئەم هەر ماینە کورد.
تورکا گۆتن: هوین تورکێن چیایینە و دڤێت هەوە فێرکەین چەوان دێ بنە مرۆڤ و تورک …. هەمی رەنگێن کۆتەکیێ دانە خەبتاندن و هەر تشتێ مە تالانکرن و ل سەر خوە تاپۆکرن، کولتۆرێ مە قەدەغەکرن و هەر تشتێ بێهنا کوردان ژێ بهێت، قەدەغەکرن … ئەم هەر ماینە کورد.
گۆتن هوین تورکن، بنیات ئەسەدینە(عەرەبن) و فارسن و هەمی رەنگێن بوهژاندنێ کو مە تونە بکەن، ئەنجامدان و بێی سڤکە خوناڤا شەرمێ رویێن وان بگرن … ئەم هەر ماینە کورد.
ئەنفال و جینوساید و ئاسمیلەکرن نەکارین مە تونە بکەن …. چونکو ئەم ژ ڤێ ئاخێ یێن پەیدابووین و ئەم ئاخین و بەرخوەدانا مە ژ هەمی رەنگێن تۆقاندن و بوهژاندنێ ئەڤجا ل بن چ ناڤ بیت، بهێزترە … دێ مینین کورد … دێ مینین کورد …
خوە نەوەستینن، ب سیاسەتا بوهوژاندنێ(ئاسمیلەکرنێ)، عەرەب کرنێ، فارسیکرنێ و تورک کرنێ ئەم نەهاتینە ژ ناڤبرن و ماینە کورد …
ئەڤجا داربرینا هەوە ژی دێ ب عیناتا مە یا ژ چیایان گرانتر و خوەڕاگتر دێ کوردستانێ ژ چاندنا دار بەرووی،دیندار، کەزان، دارمازی و …. گەشتر و ب رەوشتر لێکەین … ئەم کوردین و دێ هەر مینین کورد.
خوە نەوەستینن … خوە نەوەستینن ئەم کوردین و دێ مینین کورد.