خوە بچەمینە!!
محمەد چەلکی
ئەڤە نە جارا ئێکێیە سوفی ئەردۆغان هوسا خوە دچەمینیت. هەردەما تەنگ لێ دهێنە شدادن و عەرشێ وی دلەرزیت، مەنگەنەی ٣٦٠ پلە دزڤرینیت!! یا گرنگ ل دەف بەرژەوەندا مانا ویە ل سەر تەختەتێ دەستهەڵاتێ. لێ ڤێجارێ نەوەک چ جارایە، ڤێجاری خوە بۆ بکوژێ دۆستێ خوە جەمال خاشقجی(١٩٥٨، ٣-١٠-٢٠١٨) ئەوێ ل قونسلیا سعودیێ ل ئستەنبولێ ب دەستێ ڕەشەکێن میر محمەد بن سەلمانی هاتییە هنجن هنجکرن و کەسەکی پرتەکا گەودێ وی نەدیت، دچەمینیت! میر محمەد بن سەلمان کوژەکێ دۆستێ ویە و ل دەستپێکا ڤەکۆلینا ئەردۆغانی بنێن هاونان کونکرن و ڕاستە ڕاستە حوکمەتا سعودیا و ب تایبەت میر محمەد ب کوشتنا رۆژنامەڤان جەمال ئەلخاشقجی گونەهبار دکر.
پەیوەندیێن تورکیا و سعودیا ل بنێ کوربەقەکا شێلی و ترشدا هێلان و پەیوەندی سڕکرن. هەلبەت سەدەمێ تێکچوونا پەیوەندیێن تورکیا-سعودیا نە تەنێ کوشتنا خاشقجی بوو بەلکو مەسەلا سوریێ، ئیخوانان، حەماس، عێراق، قەتەر و یا ژ هەموویێ گرنگتر کێشا سەرکرداتیا باسکێ جیهانا ئیسلاما سونەیە. ئەگەرێن ڤێ خوە چەماندنێ دبت بۆ باسکێ ئیخوانا و ل کوردستانێ ژی ریهگەڤۆزێن ئیخوانچی شۆک بت و نەدیار بن چونکو ل دەف وان سوفی ئەردۆغانی هەلگرێ ئاڵایێ پیرۆزێ ئیسلامێیە! ئەڤ خوە چەماندنە تەنێ بۆ دولارێن سعودیایە، ئەڤرۆ ژ هەر دەمەکی پتر تورکیا د گێژەڤانکا کریزا ئابووری دا دبوورت و بهایێ لیرێ تورکی هەما بێژە ٥٠٪ ژ دەستدایە و ئێڤتینا ئابووری گەهەشتیە ٧٥٪. ل سەر ئاستێ ناڤخوە جەماوەریا سوفی ئەردۆغانی گەلەک ل ژێرە و بەرەیەکێ ئوپۆزسیۆنێ بهێز بەرامبەری وی دەرکەفتیە و ل هاڤینا بهێت، هەلبژارتنن. ئەردۆغان وەک رویڤییەکی ل هەر بیڤەکێ دگەرهیت دا خوە ژ ڤێ کریزا کەمەر شکێن رزگار بکەت، ئەڤجا وەرزێ قۆڕەتی و گەفێن رۆژانە ل رکابەر و هەڤسویێن خوە دکرن، بوویە پاییز و وەرزێ پارسەکیێ دەستپێکریە. بەری خوە بۆ میر محمەدێ بن سەلمانی بچەمیت خوە بۆ مستەر بایدنی چەماند و چوو نەمابوو دەستێ وی ماچی بکەت و پاشی ئاڵایێ سپی بۆ ئیسرائیلێ هلدا و بگەرمییەکا ئنتیکە پێشوازی ل سەرۆکێ ئیسرائیلێ ئیسحاق هێرتسوگ(٩-٣-٢٠٢٢) کر و تەکەزی ل گرنگیا پەیوەندیێن تورکیا-ئیسرائیلێ کر. ئەردوغان بۆ مانا خوە ل سەر تەختێ دەستهەلاتێ یێ ئامادەیە نەک خوە ب چەمینیت بەلکو ژ هەموو سۆز و بانگەشە و نەخشە و پلانێن خوە پاشگەز ببت. خوە چەماندن ئەگەر بۆ بەرژەوەندا بت و ب تایبەت بۆ سوفی ئەردۆغانی گەلەک ڕەوایە، لێ خوە نەچەماندن تەنێ کارێ وان کەسایە یێ رێزێ ل بەرژەوەندێن مللەتێ خوە دگرن و د ئامادەنە پێخەمەتی مللەتێ خوە جانێ خوە بکەن قۆربان.