خیانەتا رەوشەنبیری
محەمەد چەلکی
“مرۆڤ بوونەوەرەکە بەردەوام ل مانایێ دگەرهت.” ئەفلاتۆن
دبت ئەڤ مانشێتە پیچەکێ یێ هشک و تێبر بت چونکو واژە و پەژنێن ژ پەیڤا خیانەتێ دچن گەلەکن و پڕانیا بیاڤێ ژیانا مرۆڤێ ژیرمەند دگرت لەوا من ژی ب تێبری نڤێسی .
پاساو ڤەدیتن بۆ هەر خیانەتەکێ بەردەوامیدانە بۆ وی کارێ نەشایستە یێ مرۆڤ دکەت، لێ رێژا زەرمەندییا ژ وێ خیانەتێ دهێتە کرن جودایە و خیانەتا ژ هەموویێ مەزنتر خیانەتا وەڵاتی و رەوشتییە.
ل ڤێرە دخازم ل سەر خیانەتا رەوشەنبیری باخڤم چونکو ئەڤرۆ ل کوردستانێ خیانەت ب هەموو شێوەیێن خوەڤە یا بەر بەڵاڤە و رەنگەکێ کولتۆری وەرگرتییە، بۆچی دبێژم رەنگەکێ کولتۆری وەرگرتییە چونکو خیانەتکار د ناڤ جڤاکێ مە دا نەهاتنە رسوا کرن و ب پۆستێن بلند هاتنە خەلاتکرن، نە جڤاکێ کوردی توکەکا نەعلەتێ ل ستۆیێ وان کرنە و نە ژی دەستهەاڵاتا کوردی سزا دانە! ژ بەر هندێ خیانەت ل دەف مە بوویە کولتۆر.
رەوشەنبیر پێ نەڤێت پشکەکە ژ ڤی جڤاکی و هەلگرێ هەمان بیروباوەرێن جڤاکێ خوەنە لێ یا رەوشنەبیری ژ خەلکێ ئاسایی جودا دکەتن جیهنابینینا وییە و کار ل سەر رەوشەنکرنا جڤاکی دکەت. رەوشەنکرنا گرێکێن تاری و ڤەدیتنا ڕاستە ڕێیان بۆ گەهەشتنا دادپەریا جڤاکی و خوەشترکرنا رەوشا ژیارا مرۆڤی بگشتی ژ ئەرکێن رەوشەنبیرییە.
ژ بەر ئەرکێ گرانێ رەوشەنبیری و وێ خزمەتا پێشکێشی جڤاکێ خوە دکەتن هەردەم د ناڤ جڤاکێ دا وەک هێزەکا ئوپۆزسۆنی دیار دبت و دەستهەلات ب چاڤێ گۆمانێ لێ دمەیزنیت، ئەڤە خوە بۆ جڤاکێن دەمۆکراتیک ژی ڕاستە لەوا دبینین د هەموو گەهێن دیرۆکێ دا رەوشەنبیر کەفتنە بەر کوتەکا دەستهەڵاتێ و ڕاهێلانە وان دا ب ئەرکێ خوە یێ مرۆڤی ڕانەبن و جڤاک هەر بمینیت مێگەل و وەکو پەزێ سپی ل پەی شڤانی بچن!
دەستهەڵات ب هەموو شیانێن ل بەر دەست بزاڤێ دکەت دا رەوشەنبیر رۆلێ خوە نەبینیت یان هەر چ نەبیت بێدەنگ ببیت، ل ڤێرە ترسا دەستهەڵاتێ یا مافدارە چونکو دەما مرۆڤ تێگەهشت و ئەرک و مافێن خوە ناسکرن ئێدی دێ یا بزەحمەت بیت بڤێ تدارەکا هەی بکارت بمینیتە سەر تەختێ فەروەریێ.
هزر ل هەمی سەردەما هێزەکا مۆرالی ددەتە مرۆڤی هەر ئەڤ هێزەیە جڤاکی پالددەت بۆ پێشڤەچوونێ. د هەموو سەردەمێن بووری دا رەوشەنبیران(فەیلەسوفان) شەرێ هێزا تاریا جڤاکی کریە هەر ئەڤ شەرێ جاڕدای ژ ڵایێ دەستەیا بژارەیا رەوشەنبیران و ڕادەست نەبوونا وان بەرامبەری پاریێن قەلەوێن دەستهەڵاتێ و خوەش خوەشک گەفێن کنیسێ ئەورۆپی بەر بە سەرکەفتنێ برن و ئەڤرۆ هەموو جیهان قەرداری وان فەیلەسوف و بیرمەندانە.
ل رۆژهەڵاتا ناڤین و تەڤیا جیهانا سیێ رەوشەنبیران ئەڤ رۆلە نەگێرایە و نەبوونە هێزەکا مۆرالی یا ئێکگرتی بەرامبەری چویڤێ دەستهەڵاتێ و گەفێن باسکێ ئیسلامی-مەسیحی. سەدەمێن ڤێ کەفتنێ ب دیتنا من خیانەتا رەوشەنبیرانە بۆ دۆزا رەوشەنبیریێ و پاشڤەکشانا وانە بەرامبەری چویڤێ دەستهەڵاتێ و توندوتیژییا باسکێ ئایینی(ئیسلامی- مەسیحی) ب تایبەت یێ ئیسلامی.
ئەم ل سەردەمەکی دا دژین گەلەکێ مەترسیدارە و خیانەت تێدا بوویە کولتۆر و ئەرکێ رەوشەنبیران گەلەکی گرانە و نابیت بۆ پاریێن قەلەوێن دەستهەڵاتێ و تەرۆرا ئیسلاما سیاسی خوە ژ مەیدانێ بدەت پاش وەک هندەک رەوشەنبیرێن کورد ئەڤرۆ دکەن و بوونە گولبەرۆژ کانێ پارە و پۆست ژ کیش لایڤە ب هەروە دهێن بەرێخوە ددەن وی ئالی. ئەڤە خیانەتە ل دۆزا مرۆڤی بۆ گەهەشتنا ژیانەکا شایستە و داد پەروەرانە.
خیانەتا رەوشنبیری ژ خیانەتا کەسەکی بۆ پەیداکرنا پاریەکێ نانی دکەتن گەلەکا مەزنترە چونکو ب خیانەتا رەوشەنبیری نەتەنێ ڕەواتیێ ددەتن دەستهەڵاتێ بەلکو نیرکێ نەداد پەروەریێ ستویرتر لێ دکەت و دومدرێژتر لێ دکەتن.
خیانەتا رەوشەنبیران ژ هەموو خیانەتێن دن مەزنترە و مەترسیدارترە چونکو ڕەواتیێ دەت نە دادپەروەریێ، دادپەروەری ملحەما هەموو ئێشێن روی بروی دەستهەڵات و جڤاکێ دبن، ژ بەر ڤێ یەکێیە هاتیە گۆتن: ” دادپەروەری بنیاتێ دەستهەڵاتێیە.” هەر دەما دادپەروەری نەما دەستهەڵات دبیتە دبیتە دەستهەڵاتەکا داپلۆسینەر و ڕەواتیێ ژ دەست دەت.
١٨-٠٩-٢٠٢١
دهۆک