گەلێ کورد وەک متایێ هەژارکرن و کوژتنێ!

محسن ئۆسمان

ب درێژیا دیرۆکێ، ئەم کورد هەرتم بووینە بیاڤێ قوربانیێن خوەیانی و بیانیان. راستە نابیت مرۆڤ گازندان ژ دژمنان بکەت، لێ هەرزوو کوردان گۆتیە، دژمنێ ب ئاقل، باشترە ژ برایێ بێ ئاقل! لەورا نە دژمنێن مە ب ئاقل و وژدانن و نە ژی پارت و دەسەلاتێن کوردی، هندی سەرێ دەرزیکێ خەم و دلۆڤانیێ ب ڤی گەلی دا دکەن! راستە چەوا گەلێ کورد هەر تشت بۆ کوردینیێ کری، وسا ژی پارت و دەسەلاتێن کوردی، هەر تشت ژ بۆ “هەژاری، نەداری، بێدادی، زرباری، گەندەلی و تالانیا سەروەت و سامانێن کوردستانێ” کرن! لەورا گرفتێن سیاسیێن ئیرۆ، گرێدایی گەندەلی و هلوەشیانا پرۆژێ نیشتیمانینە.
ب درێژیا دەسەلاتێن باشوور، نکارینە ب گۆتارەکا هەڤبەش گەلێ خوە هەمبێز بکەن! لەورا دوهی پرۆسێسا تەڤگەرێن کوردستانێ دوور ــ نێزیک، پتر بەرێ خەبات و هێزێ ژ دژمنان دایە هەڤ، چونکو ئەو ئەنەرگی و تێکۆشینا وان ل دژهەڤ بکارئانین، خوە هند ل دژی دژمنان بکار نەئانینە. تاکو ئیرۆ ژی، ل ئەزموونا پارت و فەروەریا حکوومەتا هەرێمێ بنێرن، بەرێ تەڤ چەکێن خوە داینە خوەکوژیێ!
ب ڤێ یەکێ، گەلێ کورد ب تەڤ واتەیا پەیڤێ، ب خوین و بێ خوین ژ لایێ “دۆست، هەڤال و دژمنان” ڤە و ب فۆرمێن جودا ــ جودا “برسیکرن، دەربەدەری، بێهیڤیکرن، زیندانیکرن و…”، دهێتە کوژتن!
ل سەر رەوشەکا وەکو یا کوردستانێ، رۆماننڤیسا جەزائێری ئەحلام مستەغانمی دبێژیت، ئەو کەسێن ل جەزائر پشتی شۆرشێ دین بووین، پترن ژ وان کەسێن ل چاخێ شۆرشێ شەهیدبووین. ل ولاتێن رۆژهلاتا ناڤین/ کوردستانێ ژی، گەلەک خەلک بۆ رزگارکرنا ولاتی شەهیدبوون، لێ ئیرۆ گەلەک خەلک ل سەر دەستێ فەروەریا ڤی ولاتی دمرن.
ڤێجا گەلۆ ئیرۆ کوردستان/ حکوومەت، جهێ خوە د ناڤ “دل یان بەریکان” دا دبینیت؟! ئەز دخوازم ل ڤێ دەرفەتێ، پرسیارەکێ ژ پارت و دەسەلاتێن کوردی بکەم، گەلۆ ما تشتەکێ دی مایە هوون ب سەرێ ڤی گەلی نەئینن؟! مانێ ئەو تشتێن نەیار و دژمنان نکارین بکەن، هەوە ب سەری ڤی ملەتی ئانین!
ب کورتی، دەما ل شۆرشا فرەنسی، “گۆرگیس دانتۆن ــ Georges Danton/ 1794” بریە بەر سێداردانێ، کو یەک ژ رەهبەرێن شۆرشێ بوو، دانتۆنی پرسی: “ئەرێ شۆرش زارۆکێن خوە دخوەت؟!” مخابن هەوە نە بەس زارۆکێن خوە خوارن، بەلکو هەوە “ئەرد، ئەسمان و خەلکێن ڤی ولاتی”، ب هەڤرا داعویران! هەوە ئەزموونێن خوە، بهارا ئەرەبی و یێن جیهانێ ژ خوە را نەکرنە پەند. لەورا ل داویێ ژی، هوون دێ راستی پەندا کوردی “میرم بۆری” هێن!

محسن ئۆسمان
بەرلین، 2022.11.22