گەلۆ بۆچی ئەز باوردارم؟!
محسن ئۆسمان
ئەڤ نڤیسینە، دیاری بۆ هونەرمەند عومەر گوندیئەڤ ناڤنیشانە ب درێژیا خوەیا دیرۆکێ، ب گەلەک فۆرم و دەربرینان دەربازبوویە، مینا “برتراند راسل: بۆچی ئەز نە مەسیحی مە؟/ 1927″، “محەمەد فەرید: بۆچی ئەو نە باوردارە؟/ 1937″، “بەهجەت سینگ: بۆچی ئەز نە باوردارم/ 1931″، “ئبن وراق: بۆچی ئەز نە ئیسلامم؟/ 1995″، “جۆن ستۆت: بۆچی ئەز مەسیحی مە؟/ 2003” و “جومانە حەداد: بۆچی ئەز نە باوردارم؟/ 2013”.گەلۆ مەبەست ژ “باورداریێ” چیە؟ دیارە د دیرۆکا درێژا مرۆڤاتیێ دا، گەلەک گەنگەشە ل سەر دوئالیزما “باورداری/ مٶمن و نە باورداری”ێ هاتینەکرن. دیسان گەلەک بۆچوون و تێگەهشتن ژی، ل سەر فامکرنا ڤان تێگەهان هەنە. عەلی شەریعەتی دبێژیت، هەرکەس باوردارە، لێ ب رێک و تێگەهشتنێن خوە، چونکو کەسێن نە باوردار ژی، ب نە باورداریێن خوە باوردارن!راستە مرۆڤ نکاریت هەرتم بیروباورێن خوە بۆ یێ ل هەمبەر بسەلمینیت، لەورا “دڤێت دەما زانا/ پسپۆر دچیتە لابۆرێ، دەست ژ باوریا خوەیا ئۆلی بەردەت و دەما زانا/ پسپۆر دچیتە پەرستگەهێ ژی، دەست ژ سەلماندنا چیرۆکێن ئۆلی بەردەت/ فیراس سەواح.” ئێدی چەوا خوەدێ د دلێ مرۆڤان دایە، وسا ژی زانست د مەژیێ مرۆڤان دایە. باوریا ئۆلی د دلی دایە و باوریا زانستی ژی د ئەقلی دایە. فیراس سەواح دبێژیت، هەرکەسێ خوەدێ وی د دلێ وی دایە، لەورا هەرکەسێ بخوازیت ل خوەدێ بگەریێت، دکاریت د دلێ خوە دا ببینیت. کانت ژی دبێژیت، راستە سروش/ وەحی د دلێ تەڤ مرۆڤان دا هەیە، بەلێ هەموو مرۆڤ نکارن دەرببرن، ژ بەر هندێ گرینگیا ئۆلان د دلێ مرۆڤان دایە. لەورا دڤێت باوری و پێگیریا ئۆلی یا بێ بەرامبەر بیت، چونکو ئۆل باوریە، ئەوێن دی ژی ماف و ئەرکن.مخابن ئەڤ هەڤرکی و شەرێن ل باشوورێ کوردستانێ د ناڤبەرا “باوردار و نە باورداران” دا دهێنەکرن، ل چ بارچێن دی یێن کوردستانێ ناهێنەکرن! ئەڤە ژی، دڤێت ببیتە جهێ ل سەر راوستیانێ.ب کورتی، مرۆڤ دکاریت بێژیت، راستە ئەگەر چەند خالێن جودا د ناڤبەرا کەسێن باوردار و نە باوردار دا هەبن ژی، لێ دیسان خالێن هەڤبەش ژی هەنە. گەلۆ چما و ب تایبەتی ژی ئیرۆ، ئەم کار ل سەر خالێن هەڤبەش ناکەین؟!
محسن ئۆسمان
بەرلین، 2022.10.04