گەشتوگۆزارا گوندان و گرنگیا وێ
سەردار هێتوتی
ماستەر ب ئابوورێ گەلەک تا و چق ژ زانستێ توریزمێ دچن، هەر نڤیسەرەکی گەشتوگۆزار دابەشی چەند لقەکا کریە. مە ل ڤێرە نەڤێت ل سەر تا و لق و چقێت وێ بچین بەلکو دخازین لایەنێ باشیێ یێ توریزما گوندی بدەینە دیارکرن.
گوند ب هەبوونا خۆ جهەکێ کلتوریە و د پال کلتوری دا ناڤەندەکا بچیکا چاندنێ یە و ئاڤ و هەوایەکێ پاقژ یێ هەی و هژمارەکا کێم یا خەلکی دناڤدا دژین و ب گشتی ژیان ل گوندا یا سادەیە.
ل ڤان ساڵێن دوماهیێ و ب تایبەت ل وەلاتێت دەوروبەر توریزما گوندا بویە ناڤەکێ نووی د ناڤا گشت پرۆسا گەشتوگۆزاریێ دا و خەلکەکێ زێدە ژ ڕێڤینکان چ یێن بیانی و چ ژی یێن ناڤخۆ قەستا گۆندان دکەن و دەمەکی دیری هەمی قەرەبالغ و جەنجالیا باژێران د ناڤا سرۆشتێ پاقژێ گوندا دبورینن.
گرنگیا گوندا بۆ تورێزمێ چیە؟
ل گوندا، هەوایەکێ پاقژ ب دەست سەیرانجی دکەڤیت، هەروەسا ئەو دشێت بچیتە د ناڤا کویراتیا ژیانا کەڤنارا بەرەبابان، دشێت ل جهێ خارنا ب سەنگ مفا ژ خارنێن سڤک و ب تام یێن گوندی وەرگریت، هەروەسا ل پتریا گوندا جهێت شوینەواری لێ هەنە و کەسێ رێڤینک دشێت سەرەدانا وان جها بکەت، ژ بلێ ڤێ چەندێ شەڤێت گوندا جداهیا خۆ هەیە دگەل گشت دەمێ سەیرانێ و ل وان جها سترانێن فلکوری هەنە دگەل موزیکا رەسەن.
ل گوندا کەسێ گەریدە دشێت ب دەستێ خۆ بەرهەمێ چاندنێ بچینیت و بخۆت و هەست ب تاما بەرهەمێ تازە بکەت. ئایا ل کوردستانێ توریزما گوندا هەیە؟ چ پێنەڤێت هێشتا توریزمێ ب گشتی جهێ خۆ نەگرتیە و نەشیایە ببیتە ڕێکەکا بدەستڤەئینانا بەرهەمی بۆ گشت پرۆسا ئابووری لسەر ئاستێ دەوڵەتێ هەر چەند کارێ لسەر دهێتەکرن و هێشتا هەمی ڕەگەزێت توریزمێ ب درستی ل کوردستانێ ڕێ پێنەهاتیەدان و هزرا عەشیری ل سەر گشت پرۆسێ یا زالە.
لەورا ب روونی دیار دبیت گوند ل کوردستانێ نەشیانە ببنە جهێ سەرەدان و ڤەحەویانا گەریدان و هێدی هێدی سیمایێ خۆ یێ گونداتیێ ژ دەست ددەن بەرەڤ کونکرێتێ باژێران دچیت. یا فەرە ب پلان ناڤەندێت گرێدای گەشتوگۆزارێ د ناڤا بەرنامێت خۆ یێن گرێدای سەرەدانا ناڤەندێت جوان و باڵکێش، سەرەدانکرنا گوندان ژی بێخنە د لیستا جهێت سەردانیکرنێ دا.