کەنگی ئەم دێ ژ سیندرومێ مەلایی و جەلالی قورتال بین

شەبان مزوری

زۆر من هزرا خوە کریە گەلو بوچی ئەم دەق شکێنین؟ بوچی ئەم هەڤدو دشکێنین؟ بوچی ئەم نەڤیانێ شوینا ڤیانێ بەلاڤ دکین؟ تا کەنگی دێ لسەر پێکڤە ژیانێ ئاخڤین، ددەمەکیدا گوندەک نەشێت پێکڤە بژیت؟ سەرچاوێن ڤان گرفتاریا کینە و چنە؟ تا کەنگی دێ سینگێ مە لهەڤ بیت و پشتا مە لداگیرکەرێن مە بیت؟ ئەڤ پرسە و زۆر پرسێن دی کو ڤەرێژێن هەمان هوشمەندیێ نە کو کویر بویە ناخا جڤاکا باشورێ کوردستانێ و تا راددەکی پارچێن دن ژی یێن کوردستانێ یێ ڤەگرتی.

ڤان رۆژا ئەم نێزیکی هەلبژارتنێن پەرلەمانێ عیراقێ و وەک هەر چەندی نێزیکتر ببن چەندی بازا گوتنێن کرێت، تاوانبارکرن، شکاندن …. هتد ژ گوتنێن نەشیاو پارت و رێکخستنێن مە دێ بێژن هەڤدو. پێچەوانە ئەڤ هەلبژارتنە دڤیا با بو کوردان گرنگ نەبا کویژان لایەن پتر یان کێمتر کورسیان دبە ئەگەر ئەم خوەدان دیتنەک هەڤبەش نیشتیمانی و نەتەوی باین.

ببوچونا من ئەڤا نوکە هەی بەردەوام بونا شەرێ مەلایی و جەلالیایە کو ل ١٩٦٤ دەستپێکری. وەک پرانیا دوزانیت ئەو یەکەمین پارچە بون بو کەفتیە پارتی دیموکراتی کوردستان و سەرئەنجام بون دانوستاندنێن مەلا مستەفای لگەل بەگداد و چونا ئیبراهیم ئەحمەد، جەلال تالەبانی و هەڤالێن وان بو ئیرانێ.

ڤان هەردو لایەنا شوینا هەر لایەک سەربخوە خەباتا خوە بکەت و مژویلێ داگیرکەری بیت شوینا مژویلێ هەڤرکێ خوە بیت. لڤێرە بێ دو دولانە من دڤێت بێژن کولتورا یەکتر شکاندنێ بالە جەلالی دەستپێکریە، شوینا وانا باسا دونیا بینیا خوە کربا ژبو چارەسەرکرنا پرسا کوردی، رابون هەمی کارە خوە کرە ئەو کانێ بوچی ژناڤا پارتی دەرکەفتن و گوتنێن هەرێن کرێت ئاراستەی پارتی و سەرکردایەتیا وێ دکر.

لڤێرە بێگومان پارتی نەکو بێ دەنگ نەمان بەلکو زۆر بێرەوشتر هێرش کرن سەر وان و ناز ناڤ پیس هەما بێژە نەما لوان نەکری. هەلبەت پارتی وانەک دن ژی بو خوە ژ جەلالیا وەرگرت ئەوژی ئەو بو کو هەر کەسێ ژ پارتی جودا بوی پارتی ئەو جرسوا کریە بەری لایەنێ جودا بوی هێرش کربیت.

ژبەر رەوشا پشتی ١٩٧٥ هاتیە پێش گەلەک پارتێن دی دوروست بون و جوداهی دکەفتە بەشەک ژ وان، و بەشەک ژوان جار بجار دناڤبەرا خوەدا بشەر دچون، چونکە بەشێ مەزنێ سەرکێشیا ڤان پارتێن جودا ژی دبون دەرچویێن قوتابخانا مەلایی و جەلالی بون، لەوما هەمان کولتور لناڤبە بەردەوام بو.

گومان نینە ڤان ٦٠ سالێن بوری باشورێ کوردستانێ کارتێکرنەک بەرچاڤ هەبو لسەر پارچەن دن یێن کوردستانێ و ئەڤ یەکە باش ئاشکرا دبیت بپەیدا بونا رەوتێن جەلالی و مەلایی لپارچێن دن یێن کوردستان و بهەمان شێوە بونە دوژمنێن هەڤ و ئەڤەژی یا بەردەوامە هەیا رۆژا ئەڤرو.

ئەگەر ئەم بخوازین جڤاکەک تەندوروست ئاڤاکەین دڤێت ئەم ژ باوەری هەبون بەیەکتر ئەم دەستپێ بکەین، نە کەس نە لایەن هەنە بێ شاشی لێ نەبونا باوەریێ دناڤا هێزێن کارتێکەرێن کوردستانێ وە کریە کو سینگێ خوە بدەن یەک و پشتا خوە ب دوژمنی گەرم کەن. نابیت خەونا هێزەکا کوردی نەمان یانژی لاواز بونا هێزەک دن کوردی بیت، بەلکو خەونا هەمی لایەنەکی دڤێت بهێبونا وی بیت د ململانەک نیشتیمانی دا. دڤێت دەستبەرداری گوتارا نەشرین، رسوا، خیانەت، نوکەر، شکاندن….هتد ژ پەیڤێن کرێت کرن.

بکورتی و بکوردی تا رۆژا سینگێ وە ل هەڤدو بیت و پشتا وە لدوژمنی بیت دێ پاریەک ئاسان بن بو دوژمنێن خوە.