چاکسازییا کوردى و پرسیارێن سادە و یێن ئاڵۆز
(پشکا ئێکێ)
جاسم محمد شرنەخى
هەر چەندە چاکسازى ئێک ژ ڕێک و سونەتێن نەگوهۆڕێن ژیانێیە، خوە هەتا ئەگەر ڕەوشەک باش ژى بیت؛ چاکسازى ژبۆ باشتریێ یان ژى بۆ پارازتنێ یا فەرە، گەر نەبیت دێ مینا ئاڤا شرینا ڕاوەستاى لێ هێت، پشتى دەمەکێ هەلبەت دێ خراب بیت و گەنى بیت، هۆسان بارۆدۆخێن ئابۆرى و سیاسى و جڤاکیێن باش بێى کریارێن چاکسازیێ دێ تێکچن و بەرەڤ نهاڵا خرابیێڤە چنە خوار.
لەوا دڤیا ل وەڵاتێ مە و ل هەر جهەکێ دیتر چاکسازى کارەکێ پەیڕەو کرى و پلان ژبۆ ڕێژکرى بتن، نەکو گەلەک دەنگ بلندى ل دۆر بابەتێ وێ هەبیت و زێدە خەلکەک خوە پێ دەربئێخن و زۆر دەستان ل سینگێن خوە بدن، بێژن:
ئەمن پاڵەوانێن ڤێ کریارێ، ودێ موعجیزا پەیدا کین، ژبەرکو وى دەمى مەترسى هەیە وەکى قوتباخانەیا شرۆڤەکرنا دەرۆنى یا (سیگمۆند فروید) و (ئەلفێرد ئیدلەرى) و هەڤالبەندێ وان زۆر جەختى ل سەر کرى لێ بهێت: (ئێک ژ نیشانێن بەرۆڤاژییا هەبۆنا ڕامانەکێ یان شیانەکێ قەربۆکرنا وێیە ب پڕ بەحسکرن و گۆتنێ)، واتە: یێ زێدە بەحسێ مەڵاڤانى و پاڵەوانیا خوە د بیاڤەکێدا بکت هەلبەت ئەو دەربرینێ ژ هەستا لاوازى و کێماسیا خوە دهەمان بیاڤ دا بەر چاڤ دکت! همبانا چاکسازییا مە کوردان یا ئەڤە ژ دەستپێکا ڤێ خۆڵا حوکمڕانیێ گەلەک هاتیە پوڤدان، بەرییا گورمێن ژێ بهێت دڤێت ڕاوەستانەک ژبۆ هەلسەنگاندنا وێ هەبیت، دا بزانین تا چ سنۆر و ڕاددە ڕاستى ژبۆ وێ چەندێ هەیە، کا ئایا پرۆسیسەکا سەرکەفتیە بوو یان ژى تەنها دەنگێ دەهۆلێ ژ دویرڤە یێ خوەشە؟!
دڤییا پرسیارێن سادە و ئاڵۆزێن گرێداى چاکسازیێ هەمى بەرانبەرى کریارا چاکسازییا کوردستانى و هەمبەرى کەسێن خوە پێ دەرخستین بهێنە ئاڕاستە کرن، گرنگترین پرسیار ژى – ب دیتنا من – ئەڤێن ل خوارێ نە: – ئەرێ چاکسازی پێڤاژۆیە یان ژی ئەم دکارین بێژین شەرە؟! – چاکساز کینە؟ ، کەسێن ڤى بارى هەڵدگرن چ ساڵۆخەت و تایبەمەتندى هەنە؟ – پێشبڕ و ڕێگریێن چاکسازییێ چنە؟ – دوژمنێن چاکسازیێ کینن؟ – سەکتەرێن چاکسازیێ چنە؟ – پێشینی بۆ کێژان بیاڤیە؟، کەس، چڤاک، ئەقل، سازی…ھتد؟ – نیشان و پیڤەرێن پەیدابوون و بەرەڤ پێشڤەچوونا چاکسازیێ چنە؟ – گەلۆ، پشتی ژیێ کابینەیا حکۆمەتێ بەرەڤ داویێڤە چووی، ئەرێ نیشانێت چاکسازیێ ل سەر ئەردێ کەتواری دھێنە دیتن؟ – جوداهى دناڤبەرا چاکسازییا ڕاستەقینە و ساویردا چیە؟ – ئەرێ چاکسازییا مەیا کوردى چاکسازیەکا ڕاستەقینە یان ژى سيتاڤک و ساویرە؟ ل دەمێ بهێت دێ گۆرەى دویڤداچوونا خوە ژبۆ ڤێ پرسا هەرە گرنگ بەرسڤێ ل سەر وان پرسیارا دەم ب ئاناهییا خۆدێ.