چاڤلێکرنا مروڤێن ساویلکە، رێکەکێ بو کەچەلە خوە نابینن و مایی خوە دگوریێ خەلکی دکەن!
شەبان مزوری
١٩ خزیرانێ ساویلکێن کورد وەک پرانیا جاران بومە روژەک جیهانی تازە پەیداکرن کو ئەوژی روژا جیهانیا بابێ یە، لاپەرێن تورێن کومەلایەتی هەما بێژە هاتنە داگیرکرنێ ژ ئەڤینی و سوزداری بو بابان، هەرکەس ژ لایە خوەڤە وێنێن بابێ خوە ئانین خوار، یێن وێنێن بابێ خوە نەی باوەر دکەم شەرم دکرن وێنێ گۆرا وان بینتە خوار. باشە بیرهاتنا بابێ هەبیت و تایبەی هێشتا باب دژیانێ دابیت ئارمانجا سەرەکیا ڤێ رۆژێ یە ئانکو نە بو مریانە، ژ لایەک دن ڤە بیرهاتنێن ڤی جوری خوەشیێ لناڤ خێزانێ بەلاڤ دکەن.
باشە سەردەمەکێ بەری مامێ یاهو و گۆگل دەرکەڤن مەیدانێ زۆر درەو دەرباسدبون بئاسانی، چونکە مروڤی ژێدەرێن زۆر نەبون و ژ بەر رژێمێن دکتاتور پێزانین سنورداکری بون، لێ بەرەڤاژی ڤێ یەکێ دگەلەک بوارا دا ئەگەر نە هەمیا زۆر ئاسانە راستیێ و درەوێ ژهەڤ جوداکی.
ئەڤ کەسێن پیروزبایی لبابێن خوە دکەر د روژا جیهانیا بابێ دە، ئەگەر ٣ خولەکا خوەلی بخوە وەرکربا و تەماشەی مام گۆگل کربا کانێ رۆژەک هوسا هەیە یان نە.؟ ما باشتر نینە کو هەتکا خوە ببەن وەک وی کەسەکێ کەفچێ خوە ددەستێ خوە دگرت لێ بمالا دەواتێ نەدکەفت؟
بیروکا رۆژا بابێ ڤەدگەریت بۆ سونورا سمارت، کەچا ولیەم سمارت کو دخواست بڤی کاری سوپاسیا بابێ خوە بکەت یێ کو کاری وێ و پێنج خویشک و برایێت وێ پەروەردە و خوەدان بکەت، پشتی کو دەیکا وێ ژیانا خوە ژ دەست دای دەما زاروکێ شەشێ بوی. سالا ١٩٢٤ سەروکێ ئەمریکا کالڤین کولیدج پشتەڤانیا خوە بو دەربری. لئەمریکا سێشەمبا سێیە ژ هەیڤا خزیرانێ رۆژا بابێ یە، واتە نە ١٩ خزیرانێ یە وەک بەشەک ساویلکا نڤیسی.
وەک نمونە لسوێد، نەرویج و فینلەندا روژا بابێ یەکشەمبیا دوێ یە ژ هەیڤا نۆڤەمبەر ئانکو چریا دوێ. نەمسا یەکشەمبا دوێ ژ خزیرانێ کریە رۆژا بابێ. دەنمارک ٥ خزیرانێ. روسیا ٢٣ شواتێ. کوریا باشور ٥ گولانێ. ئەڤ چەند نمونە وێ یەکێ دسەلمینن کو پرانیا وەلاتا رۆژەکا بابێ هەیە لێ نە لگەل هەڤ دکەن.
هەر ژبەر ڤێ یەکە من پێشنیار کربو کو ئەم کورد روژا سێدارەدانا پێشەوا قازی محەمەد ئەم بکین رۆژا بابێ.
بکورتی و بکوردی بلا بەس بیت چاڤلێکرنا کورە، بلا روژێن بیرەوەریێن مە گرێدای ژیانا گەلێ مەبن