پەیامێن خوینبارین ژ دەنگێن دزەپێکری
جاسم محمد شرنەخى
ئەو گرتەیێن دەنگێ یێن ب سیاسەتمەدارێ شیعیێ عیراقى (نۆرى ئەلمالکى)ـڤە هاتینە بەرپاڵکرن و بەڵاڤکرن، گۆڕەپانا سیاسى هەژاند، ئەڤە تەنها (یا فەتتاح یا ڕەززاق) دەستپێکە ژى، وەکى خوەدیێ بەڵاڤکرنا وان دەنگەدزەپێکریا رۆژنامەڤان (عەلى فازل) ئاشکەرا کرى: دێ ب (CCـسیسیا) بەردەوام ئینتە خوار، هەر دوو چرکەیان جارەکێ، هەتا شەرمزارى و ڕەش بەلا و نامەیێت خوینێ هەر ڕۆژ ب گوهێن خەلکێ عیراقێ بکەڤن و ژبیر نەکن، واتە دبت: ئەم چاڤدێرێن سیاسى ل دەمەکێ درێژدا چاڤەڕێ بین، مەجبۆرى گوهداریا (24) پشکێن دەنگێن دزەپێکری ببین
. د پێنج پارچەیێن هەتا نهۆ بەڵاڤبووین، چەندین هێرش و هەڕەشە و ساڵۆخەت و توهمەتێن زۆر خراب و ترسناک و پیلانێن جەهنەمى ژبۆ سەرهلدانا ئاژەواگێڕی و (جەنگا ئەهلى) و (شەرێ تائیفى) و (شەرێ شیعىـشیعى)، ئەوان ل خوە کۆمکرینە و گرنگترین تەوەرێن ئاخفتنێ ئەڤە بوون: ئێکەم/ موقتەدا صەدر: زێدەترى (10) جاران د (15) چرکەیاندا بەحسى وى هاتیە کرن، ئەو سەنتڕالێ ئاخفتنێ بوویە، مالکى دبێژت ـ موقتەدى صەدرى سێ سالوخەت هەنە (ترسنۆک و پارەپەڕێس و خوین خوازە)، ژبۆ کوشتن و ڤەکوشتنێ و خوینێ هاتیە هەرچەندە مرۆڤەکێ چاڤترس و جەبانە. ـ و گۆتى من شەرێ صەدریان ل بەغدا و نەجەف و کەربەلا و بەصرا کریە، هەر چەندە ئیرانییا پشتەڤانیا وى ب (مۆشەکێن ژیرـالصواریخ الذكية) ژى دکرن، لێ من دیتن چەند بێ جەرگن. ـ بەحسێ ڕابوونا صەدریان ب تیرۆکرنێ کریە. ـ صەدر و هەڤالێن وى گەندەلچى و حەرامخۆرن مالێ دەولەتێ دخۆن. ـ موقتەدا صەدرى – ب نڤێسین ـ (12) هزار چەکدار ل سامەرا هەنە و ل سەر ئەردى تەنها (2) هزارن، و هێزێن بەدر (30ـ40) هزار چەکدار نڤێسى هەنە
. ـ ئەگەر ئەم ل هەمبەر صەدرى دەستبەرداى بن، دێ پڕۆژەیێ شیعەگەریێ بەرزە کتن. ـ موقتەدى صەدرى هەڤالێن خوە ڕێکرینە دەڤ بریتانیێن (چەپەڵـخەبیس)، ڕاهێنانا پێ دکن، دا عیراقێ و شیعەتیێ ژناڤ ببەن و پاشێ موقتەداى ژى بکوژن و پرۆژەى ڕادەستى سونەیان بکەن. ـ لێ ئەز– واتە: مالکی – دێ هەمبەر وان ب سیاسى و لەشکەرى ڕاوەستم. دووەم/ مەسعۆد بارزانى
: د پێنچ گرتەیێن دەنگیدا (3) جاران ناڤێ وى هاتیە، دبێژت ـ مەسعۆد بارزانى سوننە ل هەولێرێ هەمبێز کرینە و ژوان ڕا بوویە لێڤەگەڕ (مەرجع)، مەرەم و ئارمانجا وى ژى لێدانا شیعەیانە. ـ دبێژت: هەر چەوان بت دڤێت ئەم ئاڕاستە و پلانێن (مەسعۆد بارزانى) و (صەدرى) و (محەمد حەلبۆسى) بێخین یان دێ عیراق ژناڤ چتن. سێیەم/ سەرکردەیێن حەشدا شەعبی یا شیع:
ـ گۆتى: (فالح فەییاز) ـسەرۆکێ بەرێ یا دەستەیا حەشدا شەعبىـ، و خەلکەکێ دیتر وەکى (بەدریان) یێ ب دویڤ خوەشى و پارەى کەفتین، ب چاندنگەهێن (مەزرەعێن) خوەڤە مژویلن، تەکست ل گەندەڵى و بێ خەمیا وان هەمبەر شەر و خەباتا شیعەگەریێ کر. چوارەم/ دەربارەى ئیرانێ:
ئەوێ ژى بەهرەکا مەزن ژ ئاخفتنێن مالکى گرتیە، وەسا خوەیا دبت ڤى وەڵاتى ئیرادەیا عیراقیان ژناڤبریە، هەمى تشت ئیرانە، عیراقى ژ نیسکێ نە کەفن ژى، گرتەیێن دەنگى دبێژن: ـ بەریا نها صەدر ژلایێ ئیڕانیانڤە دهاتە بەرهەڤکرن پێخەمەت وى بکنە (حەسەن نەصروڵلاهێ عیراقێ)! ـ مەسعۆد بارزانى ژ لایێ سەرکێشیا ئیرانێڤە هاتیە ئاگەهدارکرن و هوشیارکرن: پرسا سیاسى ل عیراقێ ب ئاسایشا نەتەوەییا ئیرانێڤە گرێدایە! ـ دوو چەنگێن (هێلێن) هێزا ئیرانى هەنە چەنگێ هەوالگێڕى (ئیتیلاعات) و حکۆمەتێ ژلایەکێڤە؛ چەنگێ زێرەڤانێن شۆڕەشێ (حەرەس سەورى) ژلایەکێ دیڤە، لێ ئاخفتن و بڕیارا دویماهیێ یا (حەرەس سەوریە) کەس نەشێت مایتکرنێ تێدا بکت، ئەو (حەرەسە) ژى ددەستێن ڕابەرێ کۆمارا ئیسلامى (خامەنەئی) دانن. ـ هەر دوو چەنگ ب هاتنا سەرۆک کومارێ نوى (ئيبراهيم ڕەئیسى) زۆر نێزیکى هەڤبووینە. ـ گۆتى: بەنگێ هەمى تشتان ل عیراقێ د دەستێن ئیرانێدانە. پێنجەم/ سوننەیێن عیراقێ:
کێمترین ناڤئانیان ژلایێ مالکیڤە سوننەنە، هەر وەکى پویتە دان ب وان نەدیتە ژ کارەکێ گرنگ بت، دبێژت: ـ سوننە زۆر حاقدن ل سەر مالکى. ـ بەهرا پتر خرابن، کێمەک دبت باش هەبن. شەشەم/ ڕەوشا سیاسى ب
دیتنا مالکى دى بەرەڤ کیڤە چتن؟ و ئەو دێ چ بەرهەڤییا کتن؟ ئەڤ تەوەرێ دویماهیێ زۆر مەترسیدارە، بەهرا شێرێ ژ ئاخفتنێن هاتینە پاڵدان ب مالکیڤە گرتیە، تێدا پیلانێن دۆزەخى هاتینە دیارکرن، لێ پێخەمەت نەدرێژکرنێ؛ دێ ـب ئاناهیا خۆدێ ـوەرگێڕان و شڕۆڤەکرنا وێ و هندەک پشکێن دیترێن دەنگێن دزەپێکرى ژبۆ گۆتارا بهێت پاشئێخم.