پێکهاتنا پەترۆلێ، پیرۆزباهییا “کۆمێدیا ڕەش”!

جاسم محەممەد شەرنەخی

ئەو حەڕاما ب درێژاهییا زێدەترى (9) ساڵان و هەتا دۆهى بەردەوامى کرى، ئەڤرۆ نەبەس حەلال بوو، بەلکى کرنە جهێ شانازیکرن و مزگینبەخشین و هەژى دەستخۆشبوونێ، ئەو حەراما تا دۆهى هەر وەڵاتیەکێ هەرێمێ، چاڤدێرەک سیاسى، شاڕەزایەک ئابۆرى، پەرلەمانترەکێ دلسۆز، بسپۆرەکێ نەفت و غازێ ئاخفتنەک، پڕسیارەک، پەیڤەک، یان ژى شیرەتەک بەرۆڤاژى مەزناهى و عەزەمەتا بیرۆک و پرۆسیسا “بەرهەمئینانا پەترۆلێ يا سەربەخۆ” ب دەرخستن و فرۆتن و هنارتنا وێڤە گۆتبا، هەر ئێکسەر ب خۆفرۆشى و عیراقچى و جاشاتى ژلایێ مەزنە باڵادەستێن کۆردستانێ و میدیایا وان دهاتە ناساندن، لێ ئەڤرۆ سەبارەت پەیڤین و ئیمزاکرن ل سەر هەمان بابەت یێن هەوڵ ددن بکەنە دەستکەفتەکێ نەتەوەییێ مێژوویی، ڕێکەفتنێ ژى – یا دروست بخوە سۆزنامەیە- وەکۆ مەزنترین ناز و نیعمەت بۆ هاوڵاتیێن هەرێما کۆردستانێ یێن ڕادگەهینن!

هەمان سەرکێشێ بەریا نێزیکێ (9) ساڵان ب تژى دەڤێ خوە ب زاڕاڤێ کرمانجییا ژۆرى (سۆرانى)دگۆت: “عیڕاق ئەمرۆ موفلیسە، موشکیلە لە وەدایە بەغدا پارەى نییە، بەغدا موفلیسە” و سەرەڕاى وێ یەکێ کو گرتەڤیدیوییا لێدوانا: “بەغدا موفلیسە” دناڤا موبایل و کۆمبیۆتەر و سایت و کەناڵین جۆدا جۆدایێن سۆشیاڵ میدیایێدا هەلگرتیە، ژبلى د سەرێن مەدا ژى هێشتا ب دەنگ و ڕەنگێ سافى و زەلال وەکی خوە مایە، لێ هەر جوامێر یێ وێ هزر دکتن: ئەڤ مللەتە ژ ناڤا گشت گیانەوەرێن خۆداى هەمى خوەدى لاوازترین بیردانکن، هەر وەکى هزرا وى ئەوە مە هاوڵاتیێن هەرێمێ ب هویر و گر و بژارەیا سیاسى و ڕەوشەنبیریڤە، هەمییان میمۆرییا پەزى ژى نینە، بەلکێ ل دڤ وى مە یا ماسیێ هەیە، ئەو مەخلۆقا دەڤێ وێ ب نکلۆکێ شۆکەکێ ددڕتن، لێ تەنها ببۆرینا چەند چرکەیەکان ماسی دەڤێ خوە دهاڤێژت هەمان نکلۆک، هەتا دبتە نێچیرا ماسیگرى پشتى جارا ئێکێ ب دەڤ و لێڤ دڕاندى قۆرتالبووى، باوەرە هزرا وان ژمە ئەوە چ تشت خوە دسەرێن مەدا ناگرتن، لەوا ئەڤرۆ ئیمزاکرن ل گەل بەغدا گرنە جهێ شانازیبخوەبرنێ، و پیرۆزباهیکرنێ ل گەلێ کۆرد.

ب ڕاستى ڤێ تڕانەپێکرنا تڕاژیدى ب عەقلێ مە ڤى مللەتى هەمیێ دلێ من ئێشاند و ئەز مەندەهۆش ژى کرم، دیمەنەکێ کۆمیدیا ڕەش “Black Comedy” هاتە بەرچاڤێن من، ب بۆیەرەکێ هەستێ کەنییا تڕاژیدى (هیستیریا) خۆرتر بوو، چ بۆیەر بوو؟! ئەو ژى دەمێ دوو دیمەن د سەرێن مەدا کۆمبوون، ئێک ژ وان یێ نوییە، ل دۆر ئیمزاکرنا “هەولێر- بەغدایە” ئێکەم مانشێتێ هەرە مەزنێ بەرپەرێ ئێکێ یێ ڕۆژنامەیەکا زەرا مینا یا سەردەمێ پڕۆپاکندەیا ستالین و هێتلەرى خوە ل ناڤچاڤێن مە دایی، ڕێک ب ڤى تایتڵى بەڵاڤ بییە: “سەرکەوتنێکى دیکەى سیاسى-دیبلۆماسى حکۆمەتى هەرێمى کۆردستان” دیمەنێ کەڤن د هەمان ڕۆژنامە ل رۆژەکا سالا (2014) ل دۆر هەمان بابەت، ل عەینى جهـ مانشێەتەکێ بەرۆپشت ژ یێ بۆری هەڤالەکێ بۆ من ڤڕێکرییە، دەقێ یا کەڤن ئەها ئەڤە بوو: “سەربەخۆى ئابۆرى گڵۆپى سەوز بۆ سەربەخۆى سیاسى هەڵدەکات”، ئەگەر مرۆڤ ڤان هەردوو وێنەیێن هەوڵێن خاپاندنێ و خشیمدیتنا گەلێ خوە ژ لایێ مەزنێن وى و ڕاگەهاندنا وانڤە دبینت ئەگەر بۆ ماوەیێ دەمژمێرەکێ سەرێ خوە بهەژینت تشتەکێ سەیر نینە! جارێ دا بچەکێ ژ قەلیبانا (صەدمەیا) “کۆمیدیا ڕەش” خوە ڤەدەرکین، ئەگەر بشێین، پێخەمەت دەرفەت هەبتن ئەڤان پڕسیارێن دیالیکتیکى ئاڕاستە بکین: –

ئەرێ ئەڤ ڕێکەفتنە پشتى نێزیکى دەهـ ساڵان؛ نە ڤەگەڕانە بۆ جارگۆشەیا ئێکێ؟! – باشە مادەم ئەڤ خێر و بەرەکەت و ناز و نیعمەتا مەزن د ڤێ ڕێکەفتنێدایە – وەکى هوین ب دەڤێن خوە دبێژن- ما گەلۆ مافێ خەلکێ نینە بێژن: چما هوین هندە بێ وژدان و دلڕەق بوون وە ب دڕێژاهییا ڤان سالێن بۆرین ژ 2014- 2023 وە ئەڤ خەلکە ب بێ بەهرکرنا ژ ڤێ نیعمەتێ دفەتساند؟! – ئەرێ ما خەلک خوە ئەگەر کۆرە و کەڕ و لال ژى بن، ما کەڤل و پیست ژى نینن هەست ب سەرمایا زڤستانێ نە کرینە؟!، پڕۆسیسا فرۆتنا وەیا گازێ ب سەربەخۆیانە نەشیا ل سڕوسەقەما هەر زڤستانەکێ برمیلەکا گازێ بۆ خەلکێ دابین بکت، ئەرێ وژدانەک هەیە قەبیل بکت: قازانجا تەنها خوەگەرمکرنێ ژى ژ فرۆتنا وەیا نەفتێ نەگەهت وى گەلێ خۆدانێ نەفتێ؟!

– دیسان دێ بێژین: ما دێ کەرێ کۆرە ژى باوەرکتن: تشتەکێ ئاساییە تو پەترۆلى ب فرۆشى و ژ ئەنجامێ وێ تەڤ بەڵا و قەیرانێن ل خوارێ پەیدا ببن؟! 1

– ب 32 ملیار دۆلاران قەران پاڤێژنە لسەر پشتا هاوڵاتیێن هەرێمێ، پاشە ما وە پەترۆل دکڕى یان وە دفرۆت؟!

2- ئەو چ پڕسە پشتى ڤەگۆهازتنا پەترۆلێ ڕاوەستاى وە دگۆت هەر ڕۆژەکێ ئەم ب 37 ملیۆن دۆڵان زیناکەفتى دبن؟!، ئەڤە چ ڕادگەهینت؟ کانێ ئەو قەبارەیێن پارەی یێن خەیالێ ژى دەرباز دکن، چ لێ هاتنە؟! 3

– ئەگەر وە پەرتۆل ب قەرێت خەلکێ ژى کریبا بۆچى وە سۆتەمەنییا هاتن و چۆنێ “پانزین و گاز ئۆیڵ” وە کربیە خوین، هەتا گەلەک هەبوون نە دشییان ترۆمپێلێن خوە ژ بەر گرانەهییا سۆتەمەنیێ دەربێخن؟!

4- حەرامکەرێن دۆهى حەلالکەرێن ئەڤرۆ بۆچى مۆچەیێ فەرمانبەرێن کوردستانێ ئەوێن وە ژ بەر بندیوارێن خوە ناڤێ وان کریە مۆچەخۆر ب دەهان هەیڤان وە ژێدەرێ ژیانا وان و خێزانێن وان ھەوە دبڕین، ل ھەمان دەمێ وە نەفت دفرۆت، و بەهرەک ژێ هەتا ڕۆژا قیامەتێ وە پاشکەفت دکر، ب لێبرێن جاران وە ددا، مەهانەیا خوەلیبسەرا ببوو چل پێنجى ڕۆژ، دویماهییا هەیڤا سوباتێ – وەکۆ نمۆنە – ل 25 ئادارێ بوو، ما ئەڤە هەمى نە شکەستن بوو؟!

5- ئەرێ ئەگەر ژ نەچارى و بڤێ نەڤێ ئەڤ “سەرکەفتن و دەستکەفتنا” هندە مەزن وە تۆماڕ کر، گەلۆ ئەگەر نە ژ بێگاڤبوونێبایە، ئەگەر هوین ب کارتێن بهێزێ چۆبانە بەغدا نەکۆ ژ مەجبۆرى و پشتى بڕیارا دادگەها پاریس یا تایبەت ب ڕاوەستاندنا هنارتنا پەترۆلا هەرێمێ ب ڕێیا تۆرکیا ڕە 23-3-2023 بایە، گەلۆ ئەو ڕێکەفتن دا چەند ژ یا نهۆ مەزنتر و باشتر بتن؟! 6

– باشە ئەڤ گەلێ کۆردێ وە نێزیکى دەهـ ساڵان بێ سویج و ئەگەر وە هاڤێتییە د دۆزەخا قەیرانا ئابۆریدا، ما هەژى ئێک داخوازلێبۆرینێ نینە؟! ما دەم نەهات هوین بێژن: ئەم دانپێدانا ب خەلەتییا خوە دکین، بلا هوین ناڤێ وێ نەکەنە گۆنەها سیاسى ژى؟!