هەژاری ل کوردستانێ
سەردار هێتوتی
وەڵاتەکێ تژی بەرهەم، یێ نڤستی لسەر پەترۆلێ، لێ هەر کو دچیت هەژاری زێدەتر دبیت، بەرپرسێن چاڤدێریا جڤاکی ددەنە دیارکرن کو ئاستێ هەژاریێ ل کوردستانێ گەهشتیە 15% و ئەڤ چەندە ژی گلۆپا سورە و یا بترسە، ژ بەر کو دبیت داتایێن وان هەمی پێزانین د ناڤدا نەبن و نەشیابن رووپێڤا هەمی خێزانان بکەن. لساڵا بووری 12 هزار ژن و مێر ژ ئێک جدا بوونە، هەر چەندە ڕێڤەبەریا گرێدای چاڤدێریا ڤی بابەتی کو سەر ب حکومەتێ ڤەیە بابەتێ تەلاقێ گرێدایە ب هند هێجەتێن نە بەرکەفتی وەکی (نەبینا حەزا پێکڤە ژیانێ، جداهیا تەمەنی، نەبینا زارۆکان و نەزوکی، دەهمەن پیسی و مال جداکرنێ) کو دبیت تا ئاستەکی ئەڤ بابەتە ئەگەر بن لێ ئەگەرێ هەرە سەرەکی ئاماژە پێنەهاتیە دان کو ئەو ژی نەداری و رەوشا خرابا ئابوورا خێزانێ یە.
ب تنێ ساڵا بووری ل دهۆکێ 1798 ژن و مێرا ژێکڤەبوونە کو د چاڤ ساڵا 2020 کو 1300 کەس ژێکڤە ببوون، ڤێ ئێکێ زێدەبوون بخۆڤە دیتیە. لگور داتایێن ئامارێ یێن هەرێما کوردستانێ قەبارا خێزانێ ل کوردستانێ ژ ساڵا 2017 وەرە بەرەڤ بچیکبوونێ دچیت و ل دهۆکێ قەبارا خێزانێ ژ 7 کەسی داکەفتیە 6.2 کەس و ل سلێمانیێ ژ 5.8 داکەفتیە بۆ 4.6 کەس و ل هەولێرێ ژی قەبارە ژ 6.4 کەس داکەفتیە بۆ 5.1 کەسی. ل عیراقێ ژی قەبارێ خێزانێ بچیکبوویە وەک وەزارەتا پلاندانانا حکومەتا فیدرال دایە دیارکرن و بەڵاڤکریە د ناڤا دوو ساڵێن بووری دا ب تنێ دوو ملیون و شەش سەد هزار زارۆک ژ دایکبوونە و وەزارەت ددەتە دیارکرن کو رێژا هەژاریێ ل عیراقێ 14% یە. ئاریشا سەرەکی ژ هەژاریێ ل کوردستانێ، نەبوونا دادپەروەرانە یا دابەشکرنا داهاتی و کێمیا جهێ ئاکنجیبوونێ و گرانیا کریا عەردی و شوقەیان و ئاهێن خارنێ.