هەرێم بەرەف داگیرکرنەکا راستەوخو و نەراستەو خو ..

پەیبەر پەنابەر ..

پشتی سالێن نوتا ئەو دەرفەتا زێڕین ژبو

گەلێ باشور بتایبەت و پارچێن دی یێن وەلاتی ژدایک بو کو دشیاند دابو ب پشتەڤانیا وەلاتێن جیهانێ و گەلێ کورد ببیتە باشترین نمونەیا وەلاتەکێ خوە سەر و خودان ستاتو و سەروەری و ژبوی پارچێن دی ژی ببیتە مالباتەک و نەفەسەک کە ئەو گیانێ ب درێژاهیا سەدەکێ بریندار و برینێت ئەسمیلەکڕن و قرکرن و زیندی بن ئاخرکرن و کیمابارانکرن و دەربەدەرکرنێ شنوڤە سارێژ ببن و ب ئالیکاریا وەلاتێن زلهێزێن جیهانی چاردن رابیتەڤ سەر پیا و ژنوڤە ئالایێ کوردستانێ ل بەر مارشا نەتەویا ئەی رەقیب ل ئاسمانێ کوردستانێ سەمایێ بکەت و ژنوڤە هەست و هەلویستێن نەتەوەکێ یاخی و سیتەملێکری و بریندار ژنوڤە ڤەژینیت و ژێوارەکێ ب جیهانێ ب دەتە نیاسین کو خاک و خەلکەکێ هەی ب ناڤێ کورد ل کوردستانێ دژین و خوەدی فەداکاری و تێکوشان و خودان فەرهەنگ و چاند و دیروکن .

لێ مخابن نەبونا ئارمانچ و ستراتیژ و تەکتیکێن دیار و نەبونا سەرکردێن ژیرو ژێهاتی و نە رێکو پێکیا ناڤمالا کوردی و نەخوشیا کورسیکێ و هەرزەکاریا سیاسەتا پەرتەوازیێ و گەندەلسازیێ رێ نەدا ئەڤ ئارمانجە بگەهیتە کنارێ ئارامیێ و دقوناغێن نەساخ و ناتەندڕوست را دەرباز بو و هەر حزب و لایەنەک وەکی نوکا ل بەری دایی بو لایەکێ ڤەپەشی و بونە داردەستێن داگیر کەرا .

نە ل ناڤ سیاسەتا مەرکەزی و نەهەرێمی و نەناڤخویی و نەجیهانی سەر نەکەفتن و د ئابور‌و سیاسەت و سەکتەرێن جودا دا تویشی هەرفینێ بون و ب مخابنی ڤە دناڤ مالا خوەژی دا ل سەر ئارمانچ و ستراتیژەک دیار رێک نەکەفتن.

لەوما ژی د هەمی بیاڤێن سیاسی ئابوری جڤاکی لەشکەری پەروەردەی ساخلەمیێ دا تویشی شکەستنێ بون و ل داویێ ل وێزدگەها حکومەتەک ئێکسپایر و پەرلەمانەک ژکارکەتی و وەزاڕەتێن بێ وەزیڕ دابەزینە ئاستێ هەری نزم .

بهێن سەر مەبەستا مژارا خوە کە ئیرو دبینین
ژ لایەکێ ڤە تورکیا پتر ژ بیست کیلومەترا ئاخا هەرێمێ داگیر کر و ئێخستە بن رکێفا لەشکەرێ خوە و ئاپەراسیونێن زەمینی و ئاسمانی و ب هزاران کومپانیایێن خوە بو مەرەمێن میتێ و سیخوریێ بکار ئانین.

ژ لایێ دی ئیرانێ شیا دەستێوەردانەکا راستەوخو د ئاخ و ئابوڕێ هەرێمێ دابکەت و هەرەشێن ئیتیلائاتا وێ و موشەک و درونێت وێ هەرەشەنە ل سەر ئاسایشا نیشتمانی .

ژلایێ دی عیراقێ شیا پتر ژ پێنجی و ئێک ژ سەدێ وێ ئاخێ ڤەگەرینێتە ژێر هەژمونا خوا ئەوا ب خوینا نێزیک سێ هزار پێشمەرگا هاتیە رزگار کرن و ژدەستدانا کەرکوکێ و وێزدگەهێن پترولێ و داهات و ئابوڕێ کوردستانێ هەمی کونترول کر.

یاژ وێ ژی مەترسی تر سیاسەتا ب تەعریبکرنا سەنتەرێن باژارێن بریا کرینا ملکی بتایبەت ل هەڤلێڕا پایتەخت و جهێن گەشتیاری و بازرگانی .
ئەڤ چەندە نە بویە جهێ نیگەرانیێ و بونە هەرەشەکا نەراستەوخو ل سەر ئایندە و ئەولەهیا کوردستانێ وە جهێن گەشتیاری دنوکە دا هەمی یێ د خزمەتا گەشتیارێن عەرەب دا و کوردێ خەونا پێڤە دبین .

ژبلی ناکوکیێن پاڕت و لایەنێن کوردی کە پارتێن ئیسلامی نە و روژانە یێ ڤی مللەتی ب عەرەب دکەن و کولتورێ گزیرتا عەرەبی ل سەر مللەتی فەرز دکەن ، ژلایێ دی ڤە سێ پارتێن خودان دەستهەلات کوردستان کریە سێ زون زونا سور کو پەکەکەیە و زونا زەر کو پارتی یە و زونا کەسک کە ئێکەتیە و هەر ئێک ب سەڕێ خوە سەرەدەریێ دگەل رودانا دکەت و هەر ئێک ژ پاڕتێن کوردی دنوکە دا بویە داردەستێ وەلاتەکێ .
ژلایێ دی ژی ڤە پارتێن ڕوژهەلات بوینە بارگرانی ل سەر ڤێ پارچا پارچەکری .
یاژ هەمیێ ژی ب ئازارتر ل جهێ خەونا سەردەستیێ و دەولەتبونێ یە کو نوکە پیروزترین ئارمانچا ڤی مللەتی موچەیە کا دێ کەنگی بیتە نوچەیەکێ لەزگین وکا دێ بەغدا فڕێکەت یان نە !؟ٚ.

براستی ژی ئەگەر کورد هەر چ زویە ب ڤێ عەقلیەتێ دا نەچن و خوا ڕێک نەئێخن رەنگە دێ تویشی نسکویەکا دیا نەچاڤەڕێکری بین .

لەوانەیە سەد سالێن دی ڤەگەڕێنە پاش .
لێ دیسان ژی دبێژم بباوەرم ئەگەر د ڤان کاو دانێن نازک ژی دا ناڤمالا خوە رێک بێخن و ببن ئێک و پەیوەندین تەندروست دناڤبەرا پارچێن کوردستانی و ناڤخو دا چێ ببن و ل هەڤهاتن بێنە پێش و دەست ژ ناکوکیێن حزبی و بەرژەوەندیێن کەسی و مالباتی بەردەن کوردستان یا دقوناغەکا نوی دا و دور نینە پشتی باشورێ و روژ ئافایێ پارچێن روژ هەلات و باکور ژی ئازادببن و ببنە چوار هەرێمێن خوەسەر و دیموکڕاتیک ، لەوما ژی دبێژم بارودوخەکێ هەستیارە و پێتڤیە ب نازکی سەرەدەری دگەل بهێتە کرن .