عیراق د لاوازترین خالا ئابووری دایه ل هەمبەری تورکیا
سەردار هێتوتی
وەڵاتەکێ وێرانە، ژێرخان ل خالا هەری لاوازدایە، کارگەهـ نەبوون و ئەوێت هەی ژی ژ بەر کێشەیێن تیرور ودینی و تائیفی هاتنە گرتن، کارەب یا وێرانە زێدەباری تێچوونەکا خەیالی د ڤان 19 ساڵێت بووری دا، بێکاری د ئاستێ بڵندایە و گەنج ڕۆژانە ل سەر هێلا ڕەڤینێ نە، سیادە ب دەست حکومەتێ نینە، و ئەوا ب ناڤ حکومەت ژی ل تەهران دهێتە ئاراستەکرن. وێجا ئەڤ خۆلیسەریا لسەری مە ئاماژە دایێ دێ چاوا و ب چ میکانیزم و ب چ شینگر دێ بایکۆتا تشتێت ترکی کەی؟
هێشتا هەوە بەهرا وەڵاتیێت خۆ ژ ئارێ سپی دابیننەکریە، گەنم و جەهـێ عیراقی کو د سالێت بەری وەدا باشترین جهگرێ جیهانی بوو ئەڤرۆ ئەو زەڤی لبەر پێت سیاسیان بوینە بیابان و هین نەشیانە برنج و نۆک و باجان سۆر و خیاران بەشێ گشت عیراقیان دابین بکەن، وێجا ب چ عەقلیەت دێ بایکۆتا کاڵایێت ترکی کەن؟
بۆ گرانی و بهایێ خینا عەرەبان، هەمی ناڤەندێت عیراقی هاتنە سەر خەت و هندەک ژ وان ب گرانی ئەو کریارا ل زاخۆ شەرمزارکر و گەلەک ژ ب ناڤ سیاسیێت عیراقی گەفێت ئاگرین ژی کرن، و د ڤان دوو رۆژان دا، بابەتێ بایکۆتا کالایێت ترکی کەفتیە د رۆژەڤا عیراقیان دا و چاڵاکڤانێت عەرەب پێشنیارا بایکۆتێ دکەن، بێی کو شینگرەکی بدەن دیارکرن.
د ساڵێت بووری دا، ئەز بخۆ دگەل بایکۆتا کالایێت ترکی بووم، وەک خۆدان هەستەکێ نەتەوی، لێ لاوازیێت مە ژی چ ژ یێت عیراقێ دجدا نینە لەورا ژ بەر نەبوونا شینگران دەهـ پێنگاڤان بەر ب پاشڤەچووم، هەڕ چەندە خینا کوردان ب ساڵانە ب دەستێ عوسمانیێت خەلیفە و ئەتاتۆرکێ دیکتاتور و ئەردوغانێ ئیخوانی د ڕژیانێ دا یا بەردەوامە.
بایکۆتەک ژ پێخەمەت هاوردەکرنا کاڵایەکێ بێخێرێ بێسەروبەرێ ئیرانی مرنەکا دیتر ل تابیتا ئابوورا عیراقێ دکەڤیت، لەورا یا باشتر ئەوە هەر دوو حکومەتێت نەڤەند و هەرێمێ ب پلانێت دارشتی کار بۆ شینگرێت ئابووری یێت عیراقی بۆ کالایێت تورکی و ئیرانی بکەن.