سەرەدانا هاکان فیدانی بۆ عێراق و کوردستانێ ب چ مەبەست بوو؟
مهەممەد چەلکی
سەرەدانا وەزیرێ دەرڤە یێ تورکیا بۆ عێراقێ و هەرێما کوردستانێ (کوزەی ئیراق)(٢٢-٢٤ هەیڤا تەباخێ ٢٠٢٣) هەتا نوکە ژ لایێ کوردانڤە ب باشی نەهاتیە شرۆڤەکرن بەلکو گەلەک ب دلخوەشی پێشوازیا وی کرن و ب شانازیڤە بەحسێ سەرەدانا وی کرن. دابێژی کلیلا چارەسەریێن هەرێمێ هەمی یێن ددەستدا. ژ بیرکرن دەما دگەل وان دکۆمبوونێ دا بوو دروونێن تورکیا مالەکا کورد کرە ئامانج و ل گەلەک دەڤەرێن کوردستانێ ئاگر بەردای چیا و چەروانان!! دا سەفایا دلێ مێهاڤێ گراڤی تێک نەچیت، کەسەکی نەگۆتێ: باخچلەر(ببوورە) بەگەم تو هاتیە سەرەدانێ یان هۆشداریان ددەی!!
تشتێ بالکێشێ وێ سەرەدانێ ئەوە وەزیرێ ترکۆی ل بەغدایێ دگەل وان لایەنان کۆمبوون کریە یێن هەتا سەر هەستی پالشتی سیاسەتا ئیرانێ و دوژمنێن هەرێما کوردستانێ و دۆزا کوردینە، ژ بلی گەلەک ژ وان لایەنان ژ لایێ ئەمریکا و هەڤپەیمانییا دژی داعشێ ب تەروریست ناڤکرنە وەک سەرۆکێ عەسائیب ئەلحەق قەیس خزعەلی و حزب الله.
هەرچەندە وەزیرێ ترکۆی ڤەکری هەر تشت گۆتنە تەڤان هەتا لایەنێن کوردی ژی کو ئاڤ بەرامبەری پەکەکێ و خوەشبوونا جزایێ دادگەها ناڤدەولەتیا بازرگانیێ ل پاریس(دادگەها پاریس). ژ خوە سەرەدانا وی بۆ کەرکووکێ مەرەم دیارن و هەوجەی چ رۆهنکرنا نینە!
ئەڤ بزاڤێن تورکیا ل دەمەکی دهێن کو ئەمریکا یا بزاڤێ دکەت سنوورێ سوریێ چیت کەت و بەردەوامیێ ددەت پشتەڤانی کرنا رۆژئاڤا، ئەڤە ژی بۆ تورکیا پاریەکە ب ساناهی ناچیتە خارێ. تورکیا ژ ئەمریکا بێهیڤی بوویە کو پشتا خوە بدەت رۆژئاڤا(پەیەدێ)، ب تایبەت ژی پشتی ئەمریکا هێزەکا مەزن ئینایە سەر سنوورێ سوریێ و ل گەلەک جهان ژ سنوورێ رێککەفتنێن دگەل روسیا دەربارەی کێشا سوریێ دەرباز بووییە و فرۆکێن بێ فرۆکەڤان عەسمانێ سوریێ کرییە چاهێرا خوە، روسیا ژی بێدەنگە! تورکیا ژ ڤێ چەندێ دترسیت کو ئێدی ئەمریکا چارچۆڤێ سوریێ بگوهۆرت، نەخاسمە ڤەکشیانا عەرەبان ژ دامەزراندنا پەیوەندیان لگەل سوریێ ب پەستا ئەمریکا.
بۆ تێکدانا نەخشێ ئەمریکا یێ نەپەن( هەرچەندە ئەمریکا تەکەزیێ ل پاراستنا سنوورێن ڤان دەولەتان دکەت، تنێ شەرێ داعشێ بۆ وێ مەبەستە) تورکیا هەوارا خوە ئینایە بەر خولامێن ئیرانێ و سونێن دژی هەر داخازییەکا
کوردان.
ترسا تورکیا نە تەنێ پەیەدە و حوکمەتا هەرێما کوردستانێ بتنێیە بەلکو ژ رەوشا شلۆقا حوکمەتا ئیرانێ و بەرخوردێ ژ تێکچوونا ئیرانێ پەیدا دبیت، ژ بلی بلندبوونا پەستا دەولەتێن رۆژئاڤا ل سەر تورکیا د پرسا کوردی و مافێن مرۆڤی و دیمۆراتییێ دا لەوان تورکیا ڤێ بزاڤێ دکەت و تەڤ ئالاڤێن ددەستدا دزمەزێخیت دا رەوش هەر ل بن کونترۆلا وێ دەرنەکەڤیت. سەرەدانا هاکان فیدانی ژی بۆ ڤێ مەرەمێ بوویە.
٢-٩-٢٠٢٣