سەرۆکێ بترسە!
محمەد چەلکی
ئەڤە تورکیا ژ سیستەمێ پەرلەمانی بوویە سەرۆکاتی چ حەفتی ناچن سەرۆک ئەردۆغان ئەوێ تبلا وی هەر قیت و ژ ئەزمانێ وی ژ بلی گەف کرنێ تشتەکێ دن دەرناکەڤیت، وەزیرەک یان بەرپرسەکێ بلندێ حوکمەتێ ژ سەر پۆستێ وی لانەدت.
چ وەزیر، گزیر یان بەرپرسەکێ پۆست بلند ژ پۆستێن خوە نە دپشت ڕاستن چونکو هەما شاشیەک یان داخویانییەکا نە بدلێ ئەردۆغان بەگێ بدەت، هێ رۆژێ پەرێن خوە نەداهێلاین ئاڤابوونێ ب بڕیارەکێ ژ پۆستێ وی دهێتە لادان. چ سەردەما وەکو ڤی سەردەمێ ئەردۆغان بەگێ بەرپرس ژ سەر کارێن وان نەهاتنە لادان، ژ خوە گرتن و ڕاتەقاندنا هەر کزە دەنگەکێ ئوپۆزسیۆنێ ژ گەوریا رۆژنامەڤانەکی یان هەر وەڵاتیەکی ژ ڤێ رەوشا ئابووریا کمباخ بدەرکەڤیت، ئێکسەر تومەت دئامادەنە ئەو ژی سوی شکاندنا سەرۆکی و ڕادپێچن زیندانێ! هەروەکو د گەل رۆژنامەڤان سەدەف کاباشێ هاتیەکرن(٢٢-٠١-٢٠٢٢).
رەوشا ئابووریا تورکیا د خرابترین سەردەمێ خوە دا بوورت و رۆژانە ئێڤتینا ئابوورێ وێ پیڤەرێن مەترسیدار دخوینیت، سەڕای هەموو بزاڤێن حوکمەتێ بۆ ڕاگرتنا شکەستنا بهایێ لیرێ تورکی ڵی شکەستنا بهایێ وی بەردەوامە، ئەڤێ ژی رەوشا هەژاران ئالۆزتر لێکریە و پەیداکرنا نانێ رۆژانە بوویە ئاریشا هەری مەزن یا هەڤرویشی وەڵاتیان بووی. هەلبەت ئەگەرێن ڤێ شەپلینا ئابوورێ تورکیا سیاسەتا گێولییا ئەردوغان بەگێیە و ل سەر چ بەندکا نا ئێورت ب تایبەت دگەل ئاغایێن خوە یێن د قۆلپا ناتۆ دا.
رەوشا ئابووری پەیوەندیەکا مەزن ب سیاسەتێڤە هەیە، هەر گرژیەک یان نەئارمیەک بکەڤیتە د نەخشێ سیاسەتێ دا باندۆرا خوە ل سەر ئابوورێ دهێلیت و ب هەمان شێوە ئابوور ژی باندۆرا خوە ل شێوێ برێڤەبرنا سیاسەتێ دکەت.
تورکیا ژ کێشێن سیاسی و جڤاکی و ئابووری تلۆڤەیە ب تایبەت کێشا کوردی و سیستەمێ سیاسی پشتی بوویە سەرۆکاتی. د زهنییەتا ئەردوغان بەگێ دا کێشا کوردی کێشەکە پەیوەندی ب تەرورێڤە هەیە و ل گۆڕەی ڤی تێگەهی سەرەدەریێ دگەل کوردان دکەتن، هەلبەت ئەڤە ب خوە ڕەڤینە بۆ ڤەدیتنا نەخشە رێین چارەسەریێ.
کێشا سەرۆکی کو هەتا باندۆرێ ل سیستەمێ سیاسی و ئابووریێ تورکیا دکەت کێشا کوردیە و هەتا کێشا کوردی نەهێتە چارەسەرکرن نە سیستەمێ سیاسی و نە ژی ئابوورێ تورکیا ئارامیێ بجوەڤە دبینیت بەلکو دێ مینن پێلدار ل ڤێرە بێشێوری دکەڤیتە هەموو سکتەرێن سیاسی، جڤاکی و ئابووری و ئها نوکە رەوشا تورکیا دەربازی ڤێ قۆناغێ بوویە.
ڕاستە تورکیا خوەدی هێزەکا لەشکەری یا مۆدەرنە و شیانێن وێ ناهێنە ماندەلکرن لێ دەما مللەتەک یێ ئامادە بیت بۆ گەهەشتنا ئازادی و روومەتا خوە هەر تشتی قۆربان بکەت چ هێز نەشێن خوە ل بەر حەزا پۆڵایینا وی بگرن و مە هەموویان دیت چەوان ب سویێ شکەستی ژ ئۆپەراسیۆنا گارەی و حەفت تەنینێ دەستڤالە زڤڕی(١٤-١٥)-٠٦-٢٠٢٠! ژبلی شکەستنێن وێ د کێشا سوریا و قوبرسێ(کێشا گاز و سنوورێ ئاڤی) و بلندبوونا دەنگێن نەڕازیبوونێ ژ دەستتێوەردانێن وێ بۆ کێشا لیبیا و زێدەباری کێشێن وێ دگەل ئەمریکا (پرسا مۆشەکێن روسی و پشتەڤانیا ئەمریکا بۆ پەیەدێ ل رۆژئاڤایێ کوردستانێ) و ئێکەتیا ئەورۆپی د پرسا یونان، قوبرس و ئاوارەیان دا ئانکو سیاسەتا ئەردوغان بەگێ تورکیا بەر ب ڤێ کریزا ئابووریا مەزن بریە و چ ئاسۆیێن چارەسەریێ د ئاییندەکێ نێزیک دا دیار نینن چونکو بەگێ ل ئولییا چانکایێ روینشتی ئەردوغان بەگ نەیێ ئامادەیە دانپێنانێ ب ڤان شاسیان هەموویان بکەت و تم وەکو قڕالێن چاخێن بەرێ تبلا وی قیتە و ڕادهەژینیت ل دژی هەر رەخنەکێ.
ئابوور و ئێڤتینا وێ بڤی رەنگێ گەهەشتی ٣٦.١٪ لێ ئۆپۆزسیۆن دبێژیت هێ بلندترە هەرچەوان بیت، پشتی سەرۆکێ دەستەیا ئامارا نیشتیمانی سەعید ئەردال دینگر ئامارا گشتیا ئێڤتینا ئابووری دیارکری، ئەڤرۆ سپێدێ(٢٩-٠١-٢٠٢٢) زوی ئەردوغان بەگێ ب بریارەکا سەرۆکاتیێ ژ سەر کاری لادا و شوینگرێ وی ئورهان(ئەرهان) چەتین کایا ل شوینێ دانا.
ڕاکرن و دانانا بەرپرسان ل تورکیا بوویە کارێ رۆژانە ل جهێ بەرسینگرتنا ئاریشەیان و ڤەدیتنا رێکە چارەیان تبلا سەرۆکی قیتە و ب ناڤ چاڤێن گرێ و بگەف هەموو بەرپرسان تەرابەرا دکەت. سەرۆک بوویە ئاریشا هەری مەزنا تورکیا و هەتا هەلبژارتنێن بهێت(٢٠٢٣) دێ گەلەک جارێن دی تبلا سەرۆکی قیت بینین چونکو ترسێ دلێ سەرۆکی یێ خمخماندی کو گەلێن تورکیا د هەلبژارتنێن بهێت دا تبلا وی بچەمینن لەوا هوسا یێ بترسە! بەلێ سەرۆک یێ بترسە!
٢٩-٠١-٢٠٢٢