سیستەمەکێ دیمۆکراتی ل بەژنا (حەیرانان) بهێت!
محەمەد چەلکی
کێشین ڤێ داویێ یێن ئێکەتیا نیشتیمانی و بێدەنگیا تەڤایا ئورگانێن وێ بەرامبەری تەڤایا کێشان وێ ئێکێ سەدبارە دکەتن کو جەماوەرێ هەر پارتیەکا کوردستانێ تەنێ ل هەلبژارتنان ئەڤجا هەلبژارتن بۆ دامەزراوێن حوکمی بن یان یێن پارتایەتی بن، خوەدی دەنگ و رەنگن! وەکە دن بۆ وان نەخەمە کانێ سەرکردایەتی ب چ مەتۆد و میکانیزم کار دکەت! ئەگەرێن نە ئەکتیڤیا ئەندام و لایەنگران د کارێ پارتایەتیێ دا هەموو رێکا دەشت دهێلیت بۆ سەرهلدانا قۆرخکاری و کەسێ ئێکێ هەتا ڕادێ پیرۆزکرنا کەسێ ئێکێ یێ وێ پارتیێ. هەر ئەڤەیە دبیتە ئەگەر کو پرەنسیبێن دیمۆکراتی و هەڤپەژارندنێ هێش دهێلیڤانکا هەر پارتیەکێ دا بهێتە خەتماندن.
ئەگەر ل دیرۆکا هەر پارتیەکا کوردستانی مێزە بکەین ژ چەپی بگرە هەتا دگەهیە پارتێن ئیسلامی(باشورێ کوردستانێ) دێ بینی سەرۆک یان سکرتێرێ گشتی هەر ژ رۆژا وەرگرتنا پۆستی هەتا دمریت هەر دمینیت سەرۆک، بهندێ ژی ناراوەستن، بزاڤێ دکەن بۆ بێدەنگکرنا هەر بۆچوونەکا نوی کو ببیتە ئەگەرێ وێ چەندێ نویبوونەکێ د ناڤ پارتیێ دا پەیدا بکەت. هەلبەت ئەڤ رەنگێ سەرکرداتیان ل رەنگێ کولندێ دەرنەڤەکری دچن و ئێدی چ ژ ناڤ چ نابنە دەرێ و دبنە کێشە بۆ پرۆسەسا سیاسی کو ب رەنگەک تەندروست برێڤە بچیت چونکو سیاسەت ب خوە کارەکێ کولەکتیڤە( پێکڤە کارکرن)، لەوا دبینین کونگرێن پارتیێن کوردستانی گەلەک گیرو دبن چونکو جەنابێ سەرۆکی یان سکرتێری ترسا هندێ یا هەی ئوینەک نهێنی ل دژی هاتبیتە گێڕان، لەوان هێجەت ل پەی هێجەتێ رێز دکەن داکو کونگرە نەهێتە گێران هەتا پشت ڕاست بن.
کونگرێن چ پارتیان نەبوونە سەدەمێ نووبوون و پێشەڤەچوونێ بەلکو چەقبەستیا هەمان دیدێن بەرێنە ژبلی هەمان سەروچاڤێن بەرێ و کێشانا کەسێن بێکێر د هندەک پارتیان دا کەسێن تەلەدین دچنە رێزا پێشیێ بۆ هەر پەیڤ و دیدەکا سەرۆکی-سکرتێری چەپلان دقۆتن.
چ پارتیێن کوردستانێ دناڤخوەدا پەیڕەوا پرەنسیبێن دیمۆکراتیێ ناکەن و تەڤ کێشێن خوە ب رێکێن ئوین و پیلان گێریێ چارەسەر دکەن. هەلبەت دێ ڤەرێژا کارێن ڤان پارتیان د پرۆسەسا سیاسی و وەڵات برێڤەبرنێ دێ چەوان بیت؟
د وەڵاتێن سیستەم دیمۆکراتی دا ل پێشیێ پارتێن وان دناڤخوەدا پەیادەیا دیمۆکراتیێ دکەن و هەر چەند ساڵەکان دیمەنێن نوی و کەسێن نوی دهێنە رێزا پێشیێ و چ سکرتێر بۆ هەتا هەتایێ نامینن سکرتێر. د چ هەلبژارتنان دا ئەڤجا چ د ناڤ ئورگانێن پارتیان دا بن یان یێن پەرلەمانی بن، کەس نابێژیت گزی و سەختەکاری یا هاتیە کرن و خوە بدەن پاش و گومانێ بۆ سیستەمێ دیمۆکراتیێ پەیدا بکەن.
پارتیی د وەڵاتێن دیمۆکراتی تێدا بەرقەرار دا پالدەرەکا بهێزە بۆ جێگیربوونا سیستەمی و هەڤپەژراندنا هزر و دیدێن جودا ، لێ دەف مە وەک ل سەری من دیارکری پالدەرە بۆ تێکدانا شیرازا جڤاکی و بەڵاڤکرنا کولتۆرێ هەڤنەپەژراندنێ و خەتماندنا پرۆسەسا ب مەدەنیبوونا جڤاکی.
پارتێن کوردستانی نە بوونە هۆکار بۆ دروستکرنا جڤاکەکێ تەندروست و ڤەکرنا رێکێ بۆ گوهۆرینێن ئەرێنی و ڤەگەراندنا شکۆیێ بۆ تاکێ کوردستانی لەوا تاکێ کوردستانی هاتیە بەرکنارکرن و بێ بزاڤ هێلایە.
ئها ئەڤەیە ئەگەرێن نە ئەکتیڤییا تاکێ کوردستانی بەرامبەری رویدانان ئەڤجا ئەو رویدان پەیوەندی ب ناڤخوەیا پارتێن کوردستانێڤە هەبیت یان د نەتەوی بن.
ئەڤا نوکە د ناڤ ئێکەتێ دا روودەت ڤەرێژا کولتۆرێ پارتێن کوردستانییە ل سەر هەموو گەهێن بزاڤێن جڤاکێ سڤیل کو ب سالانە کار بۆ هاتیەکرن بۆ بێدەنگکرن و ژ کارخستنا هەموو بزاڤێن جڤاکێ سڤیل چونکو پارتێین کوردستان ژ هێزا جەماوەرێ کوردستانێ دترسن و بزاڤ کرییە سیستەمەکێ دیمۆکراتیا سەقەت کو ل بەژنا حەیرانان بهێت، دابمەزرینن و دامەزراندنە، کو دبێژنێ فیفتی فیتی و پشکانێ.
ئەڤا نوکە ل کوردستانێ دهێتە پەیادەکرن(مەرەم ژێ سیستەمە) ل چ جهێن دونیایێ نابینی چونکو خەتماندنا بزاڤێن جڤاکێ سڤیل و لغاڤکرنا وێ ژ لایێ پارتێن کوردستانیڤە جڤاکەکێ ل هەڤ رەشە و نە ئارام بەرهەم دئینیت و مەترسییە هەم بۆ پارتێن کوردستانی و هەم بۆ دابینکرنا سیستەمەکێ دیمۆکراتی و هەمە ڕەنگ کو تێدا شکۆ بۆ تاکێ کوردستانێ بڤەگەرهیت.
کێشێن نوکە یێن ئێکەتیێ کێشێن بنگەهینێن تەڤایا پارتێن کوردستانێنە بێی ئەکتیڤییا جڤاکێ سڤیل و ڤەگەراندنا شکۆیا تاکێ کوردستانی ئەڤ ئاریشە بەرۆکا پارتێن کوردستانی بەرنادەن و ئاسۆیەکا شێل و تاری چاڤەرێی کوردستانێیە، هەلبەت ئەگەر ل سەر ڤێ دەهو دووا خوە دبەردەوام بن.
“کرمێ دارێ نە ژدارێ بیت، زەواڵا دارێ نینە”.
١٦-٠٧-٢٠٢١