رۆژانێت ئەفەندی (سەیدای) !!
نەوزاد ئامێدی
بدەنگەکێ بلند: خاتین تۆ لکیڤەی لمن درەنگە، شۆلێت خەلکێ خر مانە ڕاوەستیای ئەز قۆربانی..
و بدەنگەکێ نزم (ب ھەمیڤە چایەکە و چەند ھێکەکێت دناڤ دۆھنیدانە، خۆ توو دونیایێ خراپ ناکەی، ھەی میرات)
خاتین: سەیدا دێ توو بوو خۆ زادی دانە، ئەز ناگەھم، ئەزا کارێ بچیکا دکەم و دێ کارێ خۆژی کەم دا ب دەوامێرا بگەھم..
سەیدا: بەرەف دەرێ ڕێکەت و بوو پت پتا وی و دبن لێڤاڤە گۆت: خەتێت تە نینن، خەتێت منن، ئەز ھند ڕێزێ ل تە دگرم ھەتا بێژیە من توو زادی ب خۆ دانە… نە توو بی و نە ھەکۆ توو ژن…
خاتین(ئەرێ ئەڤ زەڵامە کیڤە چۆ، کا دا زەنگەکێ بوو لێدەم): ئەلۆ.. ئەفەندی توو بوو تێلەفونا خۆ نا راکەی، توو کیڤە چووی، ما توو من و بچیکا نابەیە دەوامێ لسەر ڕێکا خۆ.
ئەفەندی: ببورە ئەزیزا من، باوەربکە شڤانی تێلەفۆنا من کر و ھەوار ژێ تاتن و گوت وەرە تانا من، من تڕۆمبێلا خۆ یا دەعماندی. ڤێچا ئەزێ برێکێڤە. ببورە ئەڤرۆ ب پێیا ھەرن یان تەکسیەکێ بخۆ بگرن، چاڤێ تە ماچیدکەم، بای بای… ئەفەندی تێلەفۆن گرت و گوتی: دێ ھەرە بلا ئەو تە ب گەھینیت ئەوێ تە بوو زاد دانای ھەی ژی کورتێ، ھەی بەڵا سەرێمن.
سەیدا چو دخارنگەهێ ڤە و بێ سڵاڤ، گوتە شاگردی بدەنگەکێ بلند: بلەز نانێ سپێدێ ب منڕا بگەهینە..
کچەکا گەنج لبەر پەنجەرا خارنگەھێڕا چۆ..
ئەفەندی: ئەی ھەوار پا توویا جوانی، دێ بلا من ستۆیێ خۆ نەشکاندبا و ئەو گلێش ل خۆ نەکربا بەڵا. دا ئەز ژی نوکە ئێک ژ ڤان خاتینێت سەر و چاڤێن خۆ پەمپ ددەن بخۆ ئینم…
ئەی هەوار، ئەرێ چ ل وێ قەلیێ ھات درەنگە من شۆلێ ھەی، ڕێڤەبەریەکا بھیڤیا من ڤە…
ئەفەندی یێ دگەل خۆ تاخڤیت و دبێژیت: ئەز نزانم کا ژنێت نۆکە بوو چنە، بەس بوو سەرگێژیێنە، خارنگەھ دمشەنە و جلشو و ئوتیکەر دئەرزانن، و ژنک بوو کەیفێ یێت ھەین… ئاخ من چ خۆ وەرتاند ب ژن و عەیالی ڤە..
شاگردێ خارنگەهێ: کەرەمکە سەیدا، هیڤیدارم بدلێ تەبیت
…..
ئەفەندی لدەرگەھێ ڕێڤەبەریێ ژۆرکەت، و ڕێڤەبەر کەفتە بەر سینگی وی
ئەفەندی وەسا خۆ بوو چەماند پیچەک مابوو سەرێ وی ب چۆکێت وی بکەڤیت، و گوتە رێڤەبەری: السلام علیکم و رحمە اللە و بەرکاتە، ئەز بەنی توو یێ چاوانی. ماشاللە ئەو چۆ ڕۆناھیە لسەر سەرۆ چاڤێت تە. باوەربکە من شڤێدی توو لخەونا خۆ دیتی، خۆدێ خێرکەت، ئھا ئەڤ ڕۆناھیە لسەر دێمێ تە بوو و ھندەک جلکێن سپێ لبەر تەبوون و ڵسەر ھەسپەکێ سپی بووی و خۆلام و جەواری لدەور و بەرێت تە بوون دا…
رێڤەبەر: کا ڕاوەستێ، ئەرێ ما تە حەفتیا بوریژی ئەڤ خەونە ب منڤە نە دیتبوو…
ئەفەندی: باوەربکە ئەزبەنی ھەژێکرنا من بووتە یا بێ وێنەیە، ئەز هند باب و دایکا خۆ دخەونا خۆدا نابینم ھندی ئەز تە دبینم. چنکۆ توو ھند مرۆڤەکێ زیرەک و بەرکەفتی، و بێ تە ئەڤ ڕێڤەبەریە دێ وێران بیت. وئەز ھند حەژ تە دکەم توو بیست و چوار سەعەتا یێ لپێش چاڤێت من…
ڕێڤەبەر: باشە سۆپاس، ئەز باش دزانم کا ئەز چەندێ زیرەک و بەرکەفتیمە… ھا ھا ھا ( وپشتا خۆ دایێ و بەرەڤ ژۆرا خۆ ب رێکەت)
ئەفەندی خۆ چەماندە ڤە و لبن لێڤێت خۆڤە گۆتە ڕێڤەبەری: توو گێ سەی، توو ب کێ خۆلامینیێ ناھێی ھەی جەھنەمی
ئەفەندی چۆ دژۆرا خۆڤە وگوت: سپپێدە باش شڤانێ دەلال، توو دزانی ئەڤە گەلەک ڕێڤەبەر لسەر منرا بورین، بەس توو باوەردکەی ژڤی ڕێڤەبەری گەندەڵ تر و پیچتر لسەر منرا نەبورینە… بێ کۆ توو باغڤی، ئەز دزانم توو حەژ ھندێ ناکەی مرۆڤ بەحسێ خەلکێ لبشتڕا بکەت، ژبەرھندێ ئەز گەلەک حەژتە دکەم، توو مرۆڤەکێ ئێکانەی لڤی باژێری ب ڤی رەوشتێ خۆ یێ جوانڤە…
بەس توو دزانی شڤانێ ئەزیز من پێویستی ب ھاریکاریا تەیە. ئەز تڤیا ب چم من شۆلەکا گەلەک گرنگ یا ھەی، و ئەگەر ئێکی پسیار من کر بێژێ یێ ب ڕۆژی بوو و یێ چۆیە مزگەفتێ و نوکە دێ ھێتە ڤە. توو دزانی بوو رۆژی و نڤێژا کەس نەوێریت باخڤیت.. باوەربکە ئەگەر شۆلا من گەلەکا زەڕۆری نەبا ئەز نەدچۆم، دایکا عەیالی گەلەکا نەساخە، و دێ بەم بەلکی ھندەک فەحسا بوو بکەین.
شڤان: سڵامەتی بیت، ما دەم ژبەر هندێ یە، تە خەم نەبیت. ئەز حەژ درەوا ناکەم لێ دێ چارەکێ بەمێ ھەتا توو تێیە ڤە و دێ کارێن تە هەمیا ئەز بڕێڤە بەم.
ئەفەندی: سۆپاس، باوەربکە توو برایێ منێ دای بابی. ئۆ بەس خۆدێ دزانیت کا ئەز چەند ڕێزگرتنێ لتە و ڕەۆشتێ تەدگرم…نۆکە بخاتراتە هەی برایێ دای بابی..
ئەفەندی بەرەف دەرڤە ب ڕێکەت و فەرمانبەرەک کەفتە بەرامبەر، ئەوژی ڕاوستیا و بگرنژینڤە بەرێخۆدای و گۆتێ: خاتینا شەرمین سپێدا تە ب گول بەیبین بیت، دێ بلا من شانسێ ھندێ ھەبا توو ببایە ھەڤالا ژۆرا من شینا شڤانێ مەلاق و جەبان و فەسادکەر… دێ بلا ھەمی دونیایێ جانی و ڕەوشتیا تە ھەبا
شەرمین: زۆڕ سۆپاس توو بباشیا خۆ وە دبێژی..
ئەفەندی: نە باوەربکە ئەڤە ژ ڕاستیێ گەلەک کێمترە، تڤیا ئەز ھۆزانڤانبام دا ئەز شیابام ھەستا خۆ بەرامبەر ڕەوشت و جوانیا تە دیارکەم…
شەرمین: تە ئەز دامە شەرمێ، ھەردەم ئاخفتنێت تە دجوانن و کەسەک بەرێزی…
ئەفەندی: تڤیا ئەز بچم دێ لشوینا ڕێڤەبەری چمە کۆمبوونەکێ لپارێزگەھێ.. تە چ نەڤیێت بووتە لگەل خۆ بینم ژدەرڤە.. ھەڕ تشتەکێ تە بڤێت، خۆ شیرێ چیچکابیت بەس توو بێژە، دێ بئاناھیا خۆدێ لبەر پێت تە بیت..
پشتی خاترا خۆ ژێ خاستی و بەرف دەرڤە برێکەتی لسەر مللێ خۆ زڤری و گۆتی: دێ ھەرە بەس ئەز دزانم توو چەند ژنەکا پیچی.. بەس ئەز نزانم ئەو کیژ کەرە دلێ وی کەفتیە تە، پا تۆ یا فەحشی… نێ ھەکە توو بۆتکس و مۆتۆکسێت دونیایێ خرا دانی، دێ ھەر ئەڤ چێلە بی…
…..
ئەفەندی ژتڕۆمبلێ دەرکەفت و گۆتە ھەڤالا: سڵاڤ ھەڤالان باش بوو ئەز ب وەرا گەھشتیم، ڕاست دا گەلەک عاجز بم ئەگەر ھین بێ من چبانە پیرۆزباھیا سەرکردێ ژێھاتی، ئەز گەلەک حەژێدکەم و نزانم دێ کەنگی بینم..
ھەمی پێکڤە چۆنە دژۆرا سەرکردەی ڤە، و گۆل ھاتنە پێشکێشکرن و سڵاڤ هاتنە کرن و ڕۆنشتنە خۆارێ.
سەرکردە: ھین ھەمی گەلەک بخێرھاتن، و ھیڤیدارم بشێم خزمەتا …
ئەفەندی ئاخفتنا سەرکردەی بری و ب حەماسەکا مەزنڤە گۆتێ: ئەز بھەمی ناڤێن خۆدێکەمە ئەزبەنی، پسیارا جەماعەتێ بکە. ھەمی گاڤا من یا گوتی یەک کەس لڤی باژیری ھەژی ڤێ کورسیکێیە، ئەوژی تووی. توو گەلەک ژھندێ مەزنتری و ھەژی جھێن باشتری. و کارێ تە یێ دیارە، پێویستی گوتنێ ناکەت. من بەری چەندەکێ گوتارەک ڵسەر وەیێن بەرێز و ڕێزدار نڤیسا بوو. من ھەر کارەکێ وە، بەس دێرەک لسەر نڤیسا بوو، بوونە نێزیکی بیست لاپەرا، و کەس نەما دەستخۆشی لمن نەکری لسەر وێ گوتارێ. توو ژ ماڵەکا نشتیمان پەروەر و پاقژی و دەنگێ باشی و زیرەکاتیا وە، بەری وە یا گەھشتیە خەلکێ باژێری.. باوەربکە بەس ناڤێ وە سەرکەفتنە بوو باژێری…
سەرکردە: سۆپاسیا ھەستا وە دکەم، بڕاست وەڵاتێ مە پێوستی مرۆڤێن دلسۆزێن وەکی وەنە.. ناڤێ تە چبوو و توو لکیرێ کاردکەی..
پشتی درکەفتین، سەرێ خۆ چەماند و تفکرە عەردی و لبن لێڤێت خۆڤە گوت، ھەی گەندەلێ خاین، تڤیا یێن وەکی تە لسێدارێ بدەن، ما بکەنە بەرپڕس، پیچاتی نەمایە تە نەکری. بەس ما دێ چ بێژینە وان مەللاق و خۆفرۆشا ئەوێن سپێدێ ھەتا شەڤێ دەستا بوو تە دقوتن، حەیف مللەتێ جەبان..
…
لترۆمبێلێ سیاربوو و بەرەف ڕێڤەبەریێ رێکەفت، و زەنگا تێلەفۆنێ لێدا و ئەفەندیژی بەرسڤ دا و گوتی: ئەلۆ کەرەمکە خاتینا من، ئەز گەلەکێ ژتە خەریبوویم، ئەڤە ژسپێدێ وەرە من توو نەدیتی، وەی پا ئەزێ بشانسم من کەسەکا وەکی تەیا ھەی دژیانا خۆدا..
خاتین: سۆپاس ئەز ژی ھەروەسا، بەس توو لکیڤەی، ما توو نا ھێیە لدیف من ڕا، دەواما من خڵاس.
ئەفەندی: ببورە ھەی چاڤ ڕەشا من ھەی ھەمی دۆنیا من، من گەلەک کار ھەبوو ئەڤرۆ، ژکۆمبوونەکێ بوو ئێکا دی، و ھێشتا ئەزێ مایم. ھەما ب تەکسیێ ھەرە ماڵ، و دەمژمێرەکا دی دێ ئەزژی ھێمە ماڵ… دێ نۆکە بای رێڤەبەرێ گازی من دکەت، بایییی…
تێلەفۆن دایخست و گوتێ: دێ ھەرە ھەی خۆدێ توو کۆشتی، خۆ ئەز شۆفێرێ بابێ تە نینم، ھەکە بەس توو پیچەکا جانبای ژی، دا بێژم لسەر خاترا جانیا وێیە، نێ نە تە ڕەنکگە و نە دەنگە. واللە ی ئەز نەبام دا ھەتا ھەتایێ مینیە لماڵ بابا خۆڤە..
….
سەیدا ب دەرگەھێ ژۆڕا خۆ لڕێڤەبەریێ ژۆرکەفت و گۆتە شڤانی: ئەڤ دەمێ تە باش ئەزیزێ برای. ببورە ئەز تەخیر بووم، توو نزانی خەستە یێت چ لێ ھاتین. ھەرکەسێ ھات واستەکێت دگەل و بەری مە چۆ ژۆرڤە.. ھەمی دز و گەندەڵن.. کەس شۆلێ خۆ بدرۆستایی ناکەت، حکومەتەکا فاشلە.. توو باوەردکەی ئەڤ سەرکردێ نۆکە کرینە مەزنێ باژێری، من بەری چەند ڕۆژەکا گوتارەک لسەر نڤیسا بوو من چ تێ نەھێلا بوو.. بنەماڵەکا خۆفرۆش و بێ سومعەت، و کابرایەکە دیڤەکێ ژێ کێمە، بەس چنکۆ مەلاقە کرنە سەرکردە و بەرپرس. تڤیا مرۆڤەکێ وەکی تە کربان بەرپرس، بەس دێ چ بێ ژیە ڤی خەلکی و ڤی سەردەمی.
شڤان: یا دیارە تە ھێشتا نەزانیە..
ئەفەندی: خێر چ چێبوویە؟
شڤان: ڕێڤەبەرێ مە ھاتە پلە بەرزکرن و دێ چیتە پایتەختی، لێ کەس نزانیت ھەتا نۆکە کا دێ کی جھێ وی گریت.
ئەفەندی: وەی توو ب مزگینی خۆش ھاتی، دێ بلا بچیتە جەھنەمێ، ما ئەو یێ ڕێڤەبەریێ بوو.. گەندەلێ پیس، تڤیا یێت ھشتی وی ئیعدام کەن، ما پلە بەرزکەن… ئەز نزانم ئەڤرۆ من چ خاریە ئەڤە دەھ جارا ئەز چۆمە توالێتێ، ڕوخسەت بیت، زکێ من یێ لێدەتە ڤە، دا خۆ ل توالێترا بگەهینم…
ل ژورا خۆ دەرکەڤت وبغاردان بەرەف ژۆرا ڕێڤەبەریڤە چۆ و دەرگەھ لێدا و خۆ لژۆرڤە قۆتا و گوتێ: ئەزبەنی ببورە بوو ئیزعاجێ، بەس ئەز نەشیامە خۆ نەھێم، پشتی من گولێ بووی توو یێ ھاتیە پلە مەزنکرن، ژلایەکیڤە ئەز گەلەک کەیف خۆش بووم. جنکۆ ھین ھەردەم مستەحقی ھندێ بوون، تڤیا نۆکە وەزیربان. لێ ژلایەکێ دی ڤە ئەز گەلەکێ پێ نەخۆش بووم کۆ ھین یێت پلە بەرزبووین!! چۆنکە دێ ئێکێ دی یێ وەک وە ژکیڤە بوومە پەیداکەن، کەسەکێ زیرەک و شەھرەزا و پاقژ و خەمخۆر، باوەربکە من کرە گری، پسیارا جەماعەتێ بکە… ئەز گەلەک حەزدکەم سۆبەھی ئیجازێ بدەیەمن، جۆنکە ئەز نەشێم لڤێرە بم دەمێ توو دچی و خاترا خۆ دخازی.. توو دبینی ئەزبەنی ئەڤە من ئەڤ دەنگ و باسە گولێ بووی ئاھا ھۆسا ڕۆندکێت منێت تێنە خارێ، ب دەستی من نینە… ئەی ھەوار ئەڤە کارەساتەکا مەزنە، بوو ڕێڤەبەری و باژێرێ مە…
ڕێڤەبەر: سۆپاسیا ھەستێ تە دکەم، ئەز دزانم کا ھۆن چەند پێویستی بمنن، لێ ئەز چ بکەم ئەڤە سەدجارا تێلەفۆنا من ل پایتەختی کرن، دا ب چمە تانا وان.. ئەز ئێکم و ئەز نەشێم ل ھەمی جھا کارکەم.. بەس تە خەم نەبیت کەسێن دلسۆزێن وەکی تە ئەز ژبیرناکەم…
ئەفەندی: تە خەم نەبیت ئەز بەنی، وەبگرە توو یێ لڤێرە، ھەر تشتەک یان دەنگ و باسەک تە بڤێت، بەس تێلەفۆنا من بکە و دێ ئەوبیت ئەوەا تە دڤێت…
لژۆرا وی دەرکەفت و بوو پتپتا وی و نەعلەتی لھەمیا باراندن..
…
گەھشتە ماڵێ و دەرگەھ ڤەکر و بژۆرکەفت
خاتین: توو گیرۆبووی سەیدا، تڕشک ساربوو..
ئەفەندی: وەی دەستێن تە نە ئێشن، کۆتلک و ڕۆژەکا ھۆسا، وەدیارە دایکا من دووعایێت باشێت بوو من کرین، ھەتا ئێکا وەکی تە بڕزقێ من کری…
خاتین: توو گەلەک گیرۆبووی، خۆ چ ئاریشە نینن؟؟
ئەفەندی: ئەز چ بکەم شۆلێ خەلکێ گەلەکە و خڵاس نابیت. ئو لسەر حالا ڕا ڕێڤەبەرێ مەژی ھاتە لادان ژبەر پیچاتیا و گەندەلیێ، و دێ بەنە پایتەختی، دا لبن چاڤدێریا وانبیت. ئەز ژی چۆم من چەند نەسیحەتەک لێکرن و من گوتێ ئەڤە بەرھەمێ کارێت وەیێت خرابە، و پێتڤیە دخۆدا بچیە خارێ…) دەنگێ زەنگا تێلەفۆنێ ھات)
ڤێجا ئەڤە کیە نۆکە تێلەفونێ دکەت، ئێ بخۆدێ ئەگەر سەرۆک وەزیرژی بیت ئەز جاب نادەم… ئاھا!! پا بخۆدێ ڕێڤەبەرە… دەنگێ ھەوە نەھێت دێ چمە ژۆرادی ئاخڤم.
ڤێجا ئەڤە کیە نۆکە تێلەفونێ دکەت، ئێ بخۆدێ ئەگەر سەرۆک وەزیرژی بیت ئەز جاب نادەم… ئاھا!! پا بخۆدێ ڕێڤەبەرە… دەنگێ ھەوە نەھێت دێ چمە ژۆرادی ئاخڤم.. ئەلووو کەرەمکە ئەز بەنی…
ئەفەندی تێلەفۆن خڵاسکر و ژ ژۆڕێ دەرکەفت بێ دەنگ ڕۆنشتە خار، دێ بێژی ئێکی یا پخ کریێ..
خاتین: ھا سەیدا پا تە گوت، ئەگەر سەرۆک وەزیرژی بیت ئەز جاب نادەم، پیچەک مابوو دا لپێش تێلەفونێڤە خۆ چەمینی..
بەس ئەڤە تە خێرە؟ توو یێ درۆستی؟ چ نە قەومیە؟ جامێر تە خێرە، تە ھاژ من ھەیە؟ ئەو وی چ گوتە تە، توو ھۆسا بەھتی؟؟؟
سەیدایێ ئەفەندی بەرێ وی یێ ل دیواری و چاڤێت وی یێت بلۆقبووین لسەریرا، و بدەنگەکێ نزم: ئەز بوومە ڕێڤەبەر!!!
نەوزاد رەشید ئامێدی
١٧/٥/٢٠٢٣