دەمێ بریارێ ھات

نەوزاد ئامێدی

کورد و د درێژیا دیروکا خودا یێ بەرزەبوو دناڤبەرا دوژمن و دۆستادا (دوو خەتێن تۆخ لبن پەیڤا دۆست). وھەردەم مە باجا ھەرە مەزنا دای، دھەمی قوناغێن دیروکا ڤێ دەڤەرێدا. نەک بەس چنکو ئەم یەک نەبووینە ونە یەک ھەلویست بووینە. بەلکو چونکە مە خواندنەک ھەڤبەش نینە بوو ئەم کینە؟ ومە چ دڤێت؟ وکی دوژمنێ مەیە؟

ئەز کوردم یان عیراقیمە؟ ئەڤە نە پەیڤەک سادیە یان پڕسا ڕاتبیە یان پرسا خزمەتگوزاریایە. ئەڤە دەستپێکا وێ تیوریا نەتەوییە ئەوا حەتا نوکە مە نەیی، و دوماھیا خەون و ئارمنجا دەولەتبوونێیە.

ئاڵایێ عیراقێ ئاڵایێ منە، یان من ئاڵایێ خۆ ھەیە؟ ئەڤە نە پاتەکە، بەلکو نیشان و ناسناما حازربوونا گەلەکی و نەتەوەکی یە. وەکی وان ھەمی نیشانێت پیروز یێت نەتەوە و ئولێت دونیایێ.

ئیران و تورکی و سوریا و عیراق، چوار وەڵاتێت داگیرکەرن یان خودان ئاخ و عەردن، و ئەمین ئەو تێکدەر و موخەرب و ئنفیساڵی؟ ئەڤە نە سیاسەتە، بەلکو رێرەوە و سرودا ژیانێیە و ئێکلاکرنا دوزا مللەتەکیە.

ئەڤە نەک بەس پرسا سیاسیایە (سێ خەتێت تۆخ و رەش لبن پەیڤا سیاسی)، بەلکو پرسا مللەتەکییە. ئێدی دەمێ ھندێ ھات یان ببن عەرەب و تورک و فارس و رازیبن ب فتوحاتێت مۆسڵمانا و داگیرکرنا برایێت مۆسڵمان لھەر چار وەڵاتا. یان ئێدی بئێک دەنک و بێ شەرم و تڕس و ب دەنگەک بلند گازیکەن و بێژن ھوین کینە و ھەوە چ دڤێت و کی دوژمنە و کا ئاڵا و کا نشتیمان و کیش نەتەوە و کیش ئاخ … ھەکو تە بریاردا، ئێدی دێ زانی دێ چکەی ئەی کوردێ بن دەست. دێ شنی زانی دێ دەنگێ خۆ دەیە کێ. دێ چاوا پاشەرۆژێ ئاڤاکەی، دێ چاوا بچیکێ خو فێرکەی، دێ کەنگی زانی کی برایە و کی داگیرکەرە، و دێ ھەستکەی خەلکێ دھوکێ و سلێمانیێ ووانێ و ئورمیێ وقامشلو نە دۆژمنن، و زمانێ وا کوردیە و نە فەرنسیە. دۆماھی ھاتنا گەندەلی و خیانەت و نەھامەتیا مللەتا، نە بدوعا و قیژیا و ھەوارایە، بەلکو ب پەروەردەکا ساخلەمە و بدروستکرنا کەسێت نشتیمان پەروەر و نەتەوە پەرێس. ئەوێ حەژ وەڵاتێ خووئاخا خۆ دکەت، نە دزیادکەت و نە خیانەتێ دکەت و نە پشتا خەلکێ خو بەردەت و نە خەلکێ خو برسی دکەت.

ئێدی دەمێ بریارێ ھات…

نەوزاد ئامێدی
٢٠⁄٠١⁄٢٠٢٤