بەلێ بو سزادانا جەردە و تالانکەرا، لێ نەخێر ژبو وێران کرنا کوچک و تەلارا

شەبان مزوری

دیمەنێن روخاندنا کوچکەک یانژی وەک بناڤ دکرن کەلایەک کو ئەڤرو هاتین ڤەگوهاستن راستەوخوە ژ دەڤەرەک سلێمانیێ دبیت بو بەشەک مەزن ئەگەر نەبێژین پرانیا خەلکی وەک لتورێن کومەلایەتی هاتین بەلاڤکرن جهێ دلخوەشی یێ بون. لێ بمن دیسان خەلکێ مە پرانیا وان سەرەدەریا تولستاندنێ هەیە دگەل ڤان جورە کێشاندا.

ئەز لسەر وێ یەکێ نارەوەستم کانێ تومەتبارکرنا ڤی جامێرێ خوەدانێ ڤێ دیوانخانێ چەند راستە یان نە. ئەز دێ بوچونا خوە وەسا دیارکەم کو ئەو تاوانێن خستینە پال ڤی جامێری بێ دو دلی هەمی دراستن و ئەز بکارەک باش دبینم دوماهیک بو کەسێن وەک ڤی لسەر تا سەری کوردستانا باشور بێتە دانان.

من بخوە گومان نینە وەلاتەک هەمی هاولاتی ژ بەلەنگازا تا زەنگینا ئەگەر خوە ئەولە نەبینن و پشت راست نەبن ژ ئەولەکاریا سامانێ خوە ئەستەمە بکارە ب شێوەک تەندوروست پێشکەفتنێ بخوەڤە ببینیت. پرانیا مە خەلکێ باشورێ کوردستانێ یان دوزانیت یانژی ژ خەلکەکی بهیستی یە کو ل هەمی دەڤەرەکێ خەلکانەک بێ رەوشت و سەرسەری لژێر ناڤێن جودا و ب پالپاشتیا پارتێن دەستهەلات گەفان ل خەلکێ دکەن، ببێ سامان دبن هەڤپشک لگەل خوەدانێن پروژێن جودا، سەرانە ژ خەلکی وەردگرن.

هەبونا جەردا و تالانکەرا وا دکەت کو مروڤێن زەنگین و پێچێبوی سەرمایێ خوە ببەن وەلاتێن دی یانژی وەک ڤان سالێن داوی قەستا ناڤەراست و باشورێ ئیراقێ دکەن. سەرئەنجاما ڤێ پارە ژ هەرێمێ دەردکەڤیت و دەرفەتێن کاری کێم دبن و داوی رێژا هەژاری بەرەف بەرز بون دچیت. لسەر مە دڤێت وەک ئەرک بیت ئەم پالپشتیا دەستهەلاتدارێن خوە بکین بو ڤان پێنگاڤا، لێ دڤێت بێژین کو ئەڤ پێنگاڤە بلەزتر بن و هێدی هێدی هەمی جەردە و تالانچیا بگریت.

ئەڤا سەری هەمی پێشەکی یەک بو ژبو خالا گرندا ئەز دخوازم بگەهینم برێکا ڤێ نڤیسینێ. زانایە ل پرانیا وەلاتا کەسێن جەردە و تالانچی یانژی بکورتی پەیداکرنا سامانی برێکێن نە یاسایێ تاوانە و خوەدانێن وان دڤێت بێن سزادان. یەک ژ سزان دادگا کرنە، پشتی پشتراستکرنا گومانا دەستدانەسەر یا سامانێ وانە.

دیمەنێن ئەڤرو یێن روخاندنێ بو من براستی ناخ هەژین بون. ژبەر ل دویف نوچەیا ئەڤی کەسی سەرانە وەرگرتیە و ژ لایەک دی دەستهەلاتا خوەیا میری بکار ئینایە ژبو کومکرنا سەرمایێ خوە. یەک ژ سەرمایێ وی ئەڤ کوچکا ئەڤرو هاتیە روخاندن. لڤێرە پرسەک تێ پێش بو من، چەوا دبیت ئاڤاهیەک ژ پارێ خەلکی هات بیت ئاڤا کرن دیسان بپارێ خەلکی بێت خرابکرن. ئاڤاکرنا وی بێگومان بەشەک ژ سوروشت و ژینگەها وێ دەڤەرێ تێکدا بو، لێ روخاندنا وێ وێرانتر لێکر ژ رویێ سروشتی و ژ لایێ ژینگەهێ.

بمن د رەوشێن وەک ڤێ کەیسێ دڤێت ئاڤاهیا تێکنەدەن بەلکو بکەن بسامانێ میری و کارەک سودمەند بو خەلکێ دەڤرێ ژێ چێ کەن. بمن ئەڤ ئاڤاهی یە دبو کربان بنکەک تەندوروستی، بنکەک بو کەسێن خوەدان پێداویستێن تایبەی، مالا بناڤسالڤە چویا، جهەکێ داوەتا……هتد.