بهار یان پائیزا کوردان؟!

محسن ئۆسمان

ب راستی، ئەزموونا 32 سالێن فەروەریا باشوور، بۆ دۆست و دژمنان دیارکر، کو کورد نکارن هەڤقەبوول بکەن و کورد نکارن خوە و ملەتی برێڤە ببەن! گەلۆ ب ڤی دەستوداری و ب تەڤ پێشهاتان، ئیرۆ هەموو رێک ناچنە پائیزا کوردان؟

راستە تێگەهێ بهارا گەلان یان بهارێن ئورۆپی/ بهارا شۆرشان 1848 درستبوو، لێ ئورۆپیان و تا رادەکێ ئەرەبان ژی، بوونەوەرەک ب ناڤێ دەولەتێ هەبوو، بەلێ پا رەوشا کوردان، کو هەرسێ نەتەوێن داگیرکەر خەبات و چاڤێ وان ل نەمانا ڤێ ئەزموونا باشوورە. سەرباری ئیرۆ رێژەیەک ژ کوردان ژی، ئێدی خەونان ب نەمانا ڤی قەورەی ڤە دبینن، مخابن تا وێ رادێ ژی، هندەک کورد خوەزیا بۆ سەردەمێ سەدام رادهلێن! مخابن پارت و دەسەلاتا كوردی، هەموو خەونێن ڤی ملەتی بن ئاخکرن، لەورا ئێدی مرۆڤ نکاریت گلی و گازندان، ژ ڤی خەلکێ مەیێ خەونان ب سەردەمێ داگیرکەران دبینن، بكەت!

راستە دڤێت وێ ژی بێژین، سروشتێ گەلەریێ دلینی و لاوازیا هشمەندیا سەرهلدەران، ل “بهارا کوردی/ 1991” و “بهارا ئەرەبی/ 2011″، بەرێ سەنتا گوهەرینێ دا قەبیلێ و ئەشیرەتێ. لەورا ل نک مە، رەنگێن باوری و سەرەدەریێ: فۆرمێ (“سەرهەڤیا ستەمکاریێ” و “کەڤنەشۆیا پیرۆز”)، گەل ئێخستیە بن گەمارا خەوێ.

بنێرە ل هەردوو نموونێن “بهارا کوردی و بهارا ئەرەبی”، دەسەلات هاتنە گوهەرین، لێ سازی و ئەقل هەرێن جارانن. لەورا پشتی ماوەکێ کورت، هەمان ستەمکاری و دەردەسەری ب ئاوایەکێ دی دووبارەبوون.

ب کورتی، نەبوونا بەرهەڤی و ژینگەها سەرهلدان و بهارێن دەڤەرێ وەکر، کو کورد ب ئەنجامێ سەرهلدانا 1991، دۆز و خەونێن شەهیدێن خوە هندا بکەن. لەورا ل داویێ دپرسم، گەلۆ هوون چ خەون بۆ پاشەرۆژا گەلێ کورد دبینن؟!

* بابەتەک بۆ گەنگەشێن ئەقلانی و ب رێز بۆ تەڤ ئالان. هیڤیدارم چ دۆست و هەڤال، پەنایێ نەبەنە بەر چەکێ بریندارکرنێ!

دهۆک، 2023.03.07