ئاژانسا ئەنادۆل: برازایا سالح موسلیم ب مەرج هاتە ئازادکرن

ئاژانسا ئەنادۆل بەلاڤکر، دالیا موسلیم برازایا سالح موسلیم ب مەرجێ چاڤدێریا دادگەهێ هاتە ئازادکرن.

ئاژانسا ئەنادۆل یا تورکی بەلاڤکر، دالیا موسلیم کو ڕۆژا ١٩ێ ڤێ مەهێ خۆ ڕادەستی پۆلیسێن باژاڕێ مێرسینێ کریە، پشتی کو ڕێکارێن وێ ل پشکا دژەتیرۆرێ تەمام بووین، ب مەرەما پشکنینێن ساخلەمیێ دبن ڕێکارێن ئەولەهیێ یێن دژوار دا بۆ نەخۆشخانەیا مێرسینێ هاتیە شاندن.

دیارکریە ژی، پشتی پشتڕاستبوون ژ ساخلەمیا وێ، بۆ دادگەهێ هاتیە شاندن و پشتی کو مەرجێ چاڤدێریا دادگەهێ بسەردا هاتیە سەپاندن هاتیە ئازادکرن.

ڕۆژا ١٩ێ تیرمەهێ، کەسوکارێن دالیا مەحمود موسلیم ڕاگەهاندن، دالیا ئەنداما یەپەژێ بوویە و بسەدەما ڕەوشا ساخلەمیێ دەست ژ ئەرکێ خۆ بەردایە و چوویە هەرێما کوردستانێ ب مەرەما چارەسەریێ، لێ ژ ئالیێ هەرێما کوردستانێ ڤە ڕادەستی تورکیا هاتیەکرن.

پشتڕا، وەزارەتا ناڤخۆیا هەرێما کوردستانێ ل ڕۆژا ٢٠ێ تیرمەهێ د زەلالکرنەکێ دا ڕاگەهاند، دالیایێ ب حەزا خۆ و ب قاچاخ چوویە تورکیا و خۆ ڕادەستی پۆلیسێن وی ولاتی کریە.